രാവണന്റെ രാജ്ഞിയായി കുറച്ച് രംഗങ്ങൾ മാത്രം; എന്നിട്ടും ‘രാമായണം’ കാജലിന് ഇത്ര പ്രിയപ്പെട്ടതാകുന്നത് എന്തുകൊണ്ട്?

ഒരു ബ്രഹ്മാണ്ഡ ചിത്രത്തിൽ അഭിനയിക്കുമ്പോൾ കൂടുതൽ സ്ക്രീൻ സമയം ലഭിക്കണമെന്നായിരിക്കും പല താരങ്ങളുടെയും ആഗ്രഹം. എന്നാൽ ‘രാമായണ’ത്തിലെ തന്റെ വേഷം ചെറുതാണെന്ന് തുറന്നുപറഞ്ഞിട്ടും ആ സിനിമയുടെ ഭാഗമായതിൽ അഭിമാനം കൊള്ളുകയാണ് കാജൽ അഗർവാൾ. രാവണന്റെ പത്നിയായ മന്ദോദരിയെയാണ് കാജൽ ചിത്രത്തിൽ അവതരിപ്പിക്കുന്നത്. കഥാപാത്രത്തിന്റെ വലുപ്പത്തേക്കാൾ കഥയുടെ മഹത്വമാണ് തനിക്ക് പ്രധാനമെന്ന് വ്യക്തമാക്കുന്ന നടിയുടെ കുറിപ്പും ഇപ്പോൾ ശ്രദ്ധ നേടുകയാണ്.

രാമായണത്തിലെ മന്ദോദരി വെറുമൊരു രാജ്ഞി കഥാപാത്രമല്ല. രാവണന്റെ ഭാര്യയും ലങ്കയിലെ രാജകുടുംബത്തിലെ പ്രധാന സാന്നിധ്യവുമാണ് അവർ. രാവണന്റെ പ്രവൃത്തികളോട് വിയോജിക്കുകയും സീതയെ തിരിച്ചയക്കണമെന്ന് ഉപദേശിക്കുകയും ചെയ്യുന്ന വിവേകശാലിയായ സ്ത്രീയായാണ് ഇതിഹാസത്തിൽ മന്ദോദരിയെ അവതരിപ്പിക്കുന്നത്. അതുകൊണ്ടുതന്നെ കഥാപാത്രത്തിന് ലഭിക്കുന്ന സ്ക്രീൻ സമയം കുറവാണെങ്കിലും കഥയുടെ വൈകാരികതയിൽ മന്ദോദരിക്ക് പ്രാധാന്യമുണ്ട്.

ആദ്യ ഭാഗത്തിൽ ലങ്കയുടെ കഥയ്ക്ക് പരിമിതമായ ഇടം മാത്രമുള്ളതിനാലാണ് തന്റെ വേഷവും ചെറുതാകുന്നതെന്ന് കാജൽ നേരത്തേ വ്യക്തമാക്കിയിരുന്നു.