‘ഞാന്‍ വേറൊരു ആളെ അയക്കാം, അയാള്‍ ചിലപ്പോള്‍ എന്നേക്കാള്‍ വലിയ നടനാകും’ മമ്മൂട്ടിയെ കുറിച്ചുള്ള രതീഷിന്റെ വാക്കുകള്‍ അച്ചട്ടായി

സിനിമയില്‍ മമ്മൂട്ടിയുടെ വളരെ അടുത്ത സുഹൃത്തായിരുന്നു നടന്‍ രതീഷ്. മമ്മൂട്ടിയേക്കാള്‍ മുന്‍പ് രതീഷ് മലയാള സിനിമയില്‍ സജീവമായിരുന്നു. രതീഷിന്റെ മരണശേഷം അദ്ദേഹത്തിന്റെ കുടുംബത്തെ സഹായിക്കാന്‍ മമ്മൂട്ടി രംഗത്തെത്തിയിരുന്നു. ഇത് അക്കാലത്ത് വലിയ വാര്‍ത്തയായിരുന്നു.

മമ്മൂട്ടിയും രതീഷും തമ്മിലുള്ള സൗഹൃദത്തിനു വര്‍ഷങ്ങളുടെ പഴക്കമുണ്ടായിരുന്നു. എന്തിന് മമ്മൂട്ടി ഇന്ന് കാണുന്ന രീതിയിലേക്ക് എത്തിയതില്‍ രതീഷ് നിര്‍ണായക പങ്കുവഹിച്ചിട്ടുണ്ടെന്ന് പറയാം.

എം.ടി.വാസുദേവന്‍ നായര്‍ തിരക്കഥയെഴുതിയ തൃഷ്ണയാണ് മമ്മൂട്ടിയും ഐ.വി.ശശിയും ആദ്യമായി ഒന്നിച്ച ചിത്രം. രതീഷിനെയായിരുന്നു സംവിധായകന്‍ ഐ.വി.ശശി ആദ്യം സമീപിച്ചത്. എന്നാല്‍, തന്റെ സിനിമകളുടെ തിരക്കുകള്‍ മൂലം രതീഷിനു വരാന്‍ കഴിഞ്ഞില്ല. പകരം ഒരാളെ അയാക്കാമെന്നും അയാള്‍ ചിലപ്പോള്‍ എന്നെക്കാള്‍ നല്ല നടനായി മാറുമെന്നും രതീഷ് അന്ന് പറഞ്ഞിരുന്നു.

അങ്ങനെ രതീഷിന്റെ നിര്‍ദേശപ്രകാരം ഐ.വി.ശശിക്കു മുന്നില്‍ എത്തിയ നടനാണ് ഇന്നത്തെ മെഗാസ്റ്റാര്‍ മമ്മൂട്ടി. തൃഷ്ണയില്‍ മമ്മൂട്ടി നായകനായി അഭിനയിച്ചു. മമ്മൂട്ടിയുടെ സിനിമാ കരിയറില്‍ തൃഷ്ണ വലിയൊരു ബ്രേക്കായി. തൃഷ്ണയ്ക്ക് ശേഷം മികച്ച കഥാപാത്രങ്ങള്‍ മമ്മൂട്ടിയെ തേടിയെത്തി. രതീഷ് പറഞ്ഞതു പോലെ തന്നെ സംഭവിച്ചു. മമ്മൂട്ടി തന്നേക്കാള്‍ വലിയ നടനായ കാഴ്ച കണ്ടാണ് രതീഷ് മരണത്തിനു കീഴടങ്ങിയത്.