സർട്ടിഫിക്കറ്റുകളിൽ ജാതിയോ മതമോ ഇല്ല, മാതാപിതാക്കൾ നൽകിയ വലിയ സ്വാതന്ത്ര്യത്തെക്കുറിച്ച് നടി മുത്തുമണി

നടിയും അഭിഭാഷകയുമായ മുത്തുമണി സോമസുന്ദരത്തിന്റെ കുടുംബവിശേഷങ്ങളും ജീവിതവും സോഷ്യൽ മീഡിയയിൽ വീണ്ടും ചർച്ചയാകുന്നു. വ്യത്യസ്ത മതവിഭാഗങ്ങളിൽ പെട്ടവരായിരുന്നിട്ടും മക്കൾക്ക് പൂർണ്ണ സ്വാതന്ത്ര്യം നൽകി വളർത്തിയ തന്റെ മാതാപിതാക്കളുടെ വിപ്ലവാത്മകമായ തീരുമാനങ്ങളെക്കുറിച്ച് താരം മുൻപ് പങ്കുവെച്ച വാക്കുകളാണ് ഇപ്പോൾ ആരാധകർക്കിടയിൽ ശ്രദ്ധ നേടുന്നത്.

മുത്തുമണിയുടെയും സഹോദരിയുടെയും സ്കൂൾ സർട്ടിഫിക്കറ്റുകളിൽ ജാതിയോ മതമോ രേഖപ്പെടുത്തിയിരുന്നില്ല. അച്ഛൻ സോമസുന്ദരൻ ഹിന്ദുവും അമ്മ ഷേർളി ക്രിസ്ത്യാനിയുമായിരുന്നിട്ടും മക്കളെ ഒരു പ്രത്യേക മതത്തിലേക്ക് മാത്രം അവർ ചുരുക്കിയില്ല. വളർന്ന ശേഷം ഇഷ്ടമുള്ള മതത്തിൽ വിശ്വസിക്കാനുള്ള പൂർണ്ണ സ്വാതന്ത്ര്യം മാതാപിതാക്കൾ മക്കൾക്ക് നൽകി. താൻ അമ്പലത്തിലും പള്ളിയിലും ഒരുപോലെ പോകാറുണ്ടെന്ന് മുത്തുമണി ഒരു അഭിമുഖത്തിൽ വെളിപ്പെടുത്തിയിട്ടുണ്ട്. കലയോടും നാടകത്തോടും തികഞ്ഞ ആഭിമുഖ്യമുണ്ടായിരുന്ന മാതാപിതാക്കളുടെ ഈ നിലപാടാണ് മുത്തുമണിയുടെ ജീവിതവീക്ഷണത്തെയും രൂപപ്പെടുത്തിയത്.

എറണാകുളം ഇടപ്പള്ളിയിൽ ജനിച്ച് വളർന്ന മുത്തുമണിക്ക് ചെറുപ്പം മുതൽക്കേ കലയോട് വലിയ താല്പര്യമായിരുന്നു. നൃത്തത്തിലാണ് തുടക്കമെങ്കിലും പിന്നീട് നാടകരംഗത്തേക്ക് ശ്രദ്ധ തിരിഞ്ഞു. സ്കൂൾ കാലത്തുതന്നെ നാടക മത്സരങ്ങളിൽ സജീവമായിരുന്ന താരം, പിന്നീട് എറണാകുളത്തെ പ്രശസ്തമായ ‘ലോകധർമ്മി’ നാടകസംഘത്തിനൊപ്പം ചേർന്ന് നിരവധി അന്താരാഷ്ട്ര വേദികളിൽ വരെ തിളങ്ങി. സിനിമയിൽ നിന്ന് അവസരങ്ങൾ തേടിയെത്തിയപ്പോഴും തന്റെ വിദ്യാഭ്യാസം മാറ്റിവെക്കാൻ മുത്തുമണി തയ്യാറായില്ല. നിയമപഠനത്തിൽ (Law) ബിരുദവും ബിരുദാനന്തര ബിരുദവും നേടി ഹൈക്കോടതിയിൽ അഭിഭാഷകയായി പ്രാക്ടീസ് ചെയ്യുന്നതിനൊപ്പം തന്നെയായിരുന്നു അഭിനയജീവിതവും മുന്നോട്ട് കൊണ്ടുപോയത്. പ്രശസ്ത സിനിമ-നാടക സംവിധായകനും തിരക്കഥാകൃത്തുമായ പി. ആർ. അരുൺ (ഫൈനൽസ് സിനിമയുടെ സംവിധായകൻ) ആണ് മുത്തുമണിയുടെ ഭർത്താവ്. വിവാഹം കഴിഞ്ഞ് 14 വർഷത്തെ നീണ്ട കാത്തിരിപ്പിനൊടുവിലാണ് ഈ ദമ്പതികൾക്ക് ഒരു ആൺകുഞ്ഞ് ജനിക്കുന്നത്.