പങ്കാളിയെ പരിചയപ്പെടുത്തി അനാര്‍ക്കലി മരിക്കാര്‍

തന്റെ പാര്‍ട്ണര്‍ അമീന്‍ ബാരിഫ് ആദ്യമായി സംവിധാനം ചെയ്യുന്ന ‘കാക്കി സര്‍ക്കസ്’ എന്ന ചിത്രം പ്രേക്ഷകരിലേക്ക് എത്തുന്നതിന്റെ ആവേശം പങ്കുവെച്ച് നടി അനാര്‍ക്കലി മരിക്കാര്‍. പങ്കാളിയുടെ കരിയറിലെ ഈ വലിയ ചുവടുവപ്പിന് സാക്ഷിയാകാന്‍ കഴിഞ്ഞതിലും ആ യാത്രയുടെ ഭാഗമാകാന്‍ സാധിച്ചതിലും വലിയ സന്തോഷമുണ്ടെന്ന് അനാര്‍ക്കലി കുറിച്ചു. പാര്‍ട്ണര്‍ക്ക് ഒപ്പമുള്ള ചിത്രവും നടി സോഷ്യല്‍ മീഡിയയിലൂടെ പങ്കുവെച്ചിട്ടുണ്ട്.

ഇന്ന് എനിക്ക് വളരെ വികാരനിര്‍ഭരമായ ഒരു ദിവസമാണ്. ചെറിയ പരിഭ്രമവും അതേസമയം വലിയ അഭിമാനവും ആവേശവുമുണ്ട്. എന്റെ പങ്കാളി അമീന്‍ ബാരിഫ് ഒരു സംവിധായകനായി അരങ്ങേറ്റം കുറിക്കുകയാണ്. അദ്ദേഹത്തിന്റെ ഈ യാത്രയുടെ ഭാഗമാകാന്‍ കഴിഞ്ഞതില്‍ ഞാന്‍ ഭാഗ്യവതിയാണ്. ഇതിലെ ഒരു പാട്ട് ഞാന്‍ പാടിയിട്ടുണ്ട്. കൂടാതെ, മികച്ച പ്രകടനം കാഴ്ചവച്ച ഗൗതമി നായര്‍ക്ക് വേണ്ടി ഡബ്ബ് ചെയ്യാനും സാധിച്ചു. ഞങ്ങള്‍ മികച്ച രീതിയില്‍ തന്നെ ഇത് ചെയ്തിട്ടുണ്ടെന്ന് വിശ്വസിക്കുന്നു. കാക്കി സര്‍ക്കസ് ഇപ്പോള്‍ സീ5-ല്‍ കാണാം’, അനാര്‍ക്കലി ഇന്‍സ്റ്റഗ്രാമില്‍ കുറിച്ചു.

തനിക്കൊരു കാമുകനുണ്ടെന്നും ഒരുമിച്ചാണ് താമസിക്കുന്നതെന്നും അനാര്‍ക്കലി മുന്‍പ് ഒരു അഭിമുഖത്തില്‍ വെളിപ്പെടുത്തിയിരുന്നു. ”എനിക്കൊരു ബോയ്ഫ്രണ്ടുണ്ട്. സംവിധായകന്‍ ആകണമെന്നാണ് അവന്റെ ആഗ്രഹം. സിനിമയെക്കുറിച്ച് നല്ല ധാരണയുണ്ട്. കഥ കേട്ടാല്‍ അവനോട് സംസാരിക്കും. അതുപോലെ ചേച്ചിയോടും അഭിപ്രായം തേടും. അവര്‍ രണ്ടു പേരുമാണ് ഇക്കാര്യത്തില്‍ എന്നെ സഹായിക്കുന്നത്. അപൂര്‍വമായി മാത്രമേ ഒറ്റയ്ക്ക് തിരഞ്ഞടുക്കാറുള്ളൂ. ഗഗനചാരി അങ്ങനെ ഒറ്റയ്ക്ക് ഓക്കെ പറഞ്ഞ സിനിമയാണ്. ബോയ്ഫ്രണ്ടും ഞാനും ഇപ്പോള്‍ ഒരുമിച്ചാണ് താമസം. ഉമ്മച്ചി, ബാപ്പ, ചേച്ചി, അവന്റെ വീട്ടുകാര്‍ അങ്ങനെ എല്ലാവര്‍ക്കും അറിയാം. ഇനി ഔപചാരികതയുടെ ആവശ്യം മാത്രമേയുള്ളൂ. അതുകൊണ്ട് പതുക്കെ മതിയെന്നാണ് തീരുമാനം. അഭിനയത്തില്‍ തന്നെയാണ് ഇപ്പോഴത്തെ ശ്രദ്ധ.”- അനാര്‍ക്കലി അഭിമുഖത്തില്‍ പറഞ്ഞത്.