എന്റെ അച്ഛനും അമ്മയും ശരിയായ ആള്‍ക്കാരല്ലെന്ന് പറഞ്ഞവരുണ്ട്: കനി കുസൃതി

പ്രശസ്ത ചലച്ചിത്ര നടിയും മോഡലുമാണ് കനി കുസൃതി. സാമൂഹ്യ പ്രവര്‍ത്തകരും പ്രമുഖ യുക്തിവാദികളുമായ ഡോ. എ.കെ. ജയശ്രീയുടെയും, മൈത്രേയ മൈത്രേയന്‍െയും മകളായി തിരുവനന്തപുരത്ത് ജനിച്ചു. 2009ല്‍ പുറത്തിറങ്ങിയ കേരള കഫേ എന്ന ചിത്രത്തിലൂടെയാണ് ശ്രദ്ധിക്കപ്പെടുന്നത്. ബിരിയാണി എന്ന ചലച്ചിത്രത്തിലൂടെ 2019ല്‍ മികച്ച നടിക്കുള്ള കേരളസംസ്ഥാന ചലച്ചിത്ര പുരസ്‌കാരം ലഭിച്ചിരുന്നു.

മൈത്രേയനും ജയശ്രീയും നിയമപരമായി വിവാഹം ചെയ്തവരല്ല. വിവാഹമുള്‍പ്പെടെയുള്ള സങ്കല്‍പ്പങ്ങളില്‍ വിശ്വസിക്കുന്നില്ലെന്നാണ് ഇവര്‍ പറയുന്നത്.

മാതാപിതാക്കള്‍ വിവാഹം കഴിക്കാത്തതിനാല്‍ ചെറുപ്പം മുതല്‍ താന്‍ പലവിധത്തിലുള്ള ചോദ്യങ്ങളും കേള്‍ക്കേണ്ടി വന്നിട്ടുണ്ടെന്ന് പറയുകയാണ് താരം. ആളുകളും ബന്ധുക്കളുമടക്കം തന്റെ അച്ഛനും അമ്മയും ശരിയായ ആള്‍ക്കാരല്ല എന്ന രീതിയില്‍ പലപ്പോഴും സംസാരിച്ചിട്ടുണ്ടെന്നാണ് കനി പറയുന്നത്. അവര്‍ ശരിയായിട്ടുള്ള ആള്‍ക്കാരല്ല, മകള്‍ എന്തായാലും കുഴപ്പമില്ലാതായി എന്നൊക്കെ ചിലര്‍ പറഞ്ഞു എന്നാണ് താരം പറയുന്നത്.