ഗെയിം ത്രില്ലറില്‍ അഭിനയിക്കാന്‍ മെഗാസ്റ്റാര്‍ ഒരുങ്ങുന്നു; സംവിധാനം സൂപ്പര്‍ഹിറ്റ് തിരക്കഥാകൃത്തിന്റെ മകന്‍

2023 ല്‍ ഗെയിം ത്രില്ലറിന്റെ ഭാഗമാകാന്‍ മെഗാസ്റ്റാര്‍ മമ്മൂട്ടി. സൂപ്പര്‍ഹിറ്റ് തിരക്കഥാകൃത്ത് കലൂര്‍ ഡെന്നീസിന്റെ മകന്‍ ഡീന്‍ ഡെന്നീസ് സംവിധാന രംഗത്ത് അരങ്ങേറ്റം കുറിക്കുന്ന ചിത്രമാണ് ഇത്. അടുത്ത വര്‍ഷം തുടക്കത്തില്‍ ചിത്രവുമായി ബന്ധപ്പെട്ട ഔദ്യോഗിക സ്ഥിരീകരണം വന്നേക്കും.

കഥ കേട്ട് മമ്മൂട്ടി വാക്ക് കൊടുത്തതായാണ് പുറത്തുവരുന്ന റിപ്പോര്‍ട്ടുകള്‍. ചിത്രം ഒരു ബിഗ് ബജറ്റ് ക്യാന്‍വാസില്‍ ആയിരിക്കും ഒരുങ്ങുകയെന്നും റിപ്പോര്‍ട്ടുകളുണ്ട്.

അതേസമയം, മമ്മൂട്ടിയുടെ അടുത്ത സിനിമയും ഒരു നവാഗത സംവിധായകനൊപ്പം ആണ്. പുതിയ നിയമം, ദി ഗ്രേറ്റ് ഫാദര്‍, ക്യാപ്റ്റന്‍, ലൗ ആക്ഷന്‍ ഡ്രാമ തുടങ്ങി ഒരുപിടി നല്ല സിനിമകളുടെ ക്യാമറമാനായി വര്‍ക്ക് ചെയ്ത റോബി വര്‍ഗീസ് രാജ് സംവിധാനം ചെയ്യുന്ന ചിത്രത്തിലാണ് മമ്മൂട്ടി നായകനായി എത്തുക.

ഡിസംബര്‍ 26 ന് ചിത്രത്തിന്റെ പൂജ നടക്കുമെന്നാണ് വിവരം. ജനുവരി ഒന്നിന് മമ്മൂട്ടി ചിത്രത്തിന്റെ സെറ്റില്‍ ജോയിന്‍ ചെയ്തേക്കും. മമ്മൂട്ടി കമ്പനി തന്നെയാണ് ചിത്രം നിര്‍മിക്കുന്നത്. മമ്മൂട്ടിയുടെ 421-ാം ചിത്രമാണിത്. സിനിമയുടെ പേര് ഇതുവരെ പുറത്തുവിട്ടിട്ടില്ല. ഇന്‍വസ്റ്റിഗേഷന്‍ ത്രില്ലറായിരിക്കും ചിത്രമെന്നാണ് വിവരം.