മമ്മൂട്ടി-ബി.ഉണ്ണികൃഷ്ണന്‍ ചിത്രം ഉപേക്ഷിക്കില്ല; അത് നടക്കും

മമ്മൂട്ടിയെ നായകനാക്കി ബി.ഉണ്ണികൃഷ്ണന്‍ സംവിധാനം ചെയ്യാന്‍ പോകുന്ന സിനിമ ഉപേക്ഷിച്ചു എന്ന തരത്തില്‍ പ്രചരിക്കുന്ന വാര്‍ത്തകള്‍ അടിസ്ഥാനരഹിതം.

മമ്മൂട്ടി ചിത്രവുമായി ബി.ഉണ്ണികൃഷ്ണന്‍ മുന്നോട്ടു പോകുമെന്നാണ് മെഗാസ്റ്റാറുമായി അടുത്ത വൃത്തങ്ങളില്‍ നിന്ന് അറിയാന്‍ സാധിച്ചത്. ഡേറ്റ് ക്ലാഷ് കാരണം ബി.ഉണ്ണികൃഷ്ണന്‍ ചിത്രത്തില്‍ നിന്ന് മമ്മൂട്ടി പിന്മാറുമെന്ന് ചില മാധ്യമങ്ങളില്‍ നേരത്തെ വാര്‍ത്ത വന്നിരുന്നു.

കെട്ട്യോളാണ് എന്റെ മാലാഖ സംവിധായകന്‍ നിസാം ബഷീര്‍ സംവിധാനം ചെയ്യുന്ന റോഷാക്കിന്റെ സെറ്റിലാണ് ഇപ്പോള്‍ മമ്മൂട്ടി.

റോഷാക്ക് ഷൂട്ടിങ് പൂര്‍ത്തിയായാല്‍ ബി.ഉണ്ണികൃഷ്ണന്‍ ചിത്രത്തില്‍ മമ്മൂട്ടി ജോയിന്‍ ചെയ്യുമെന്നാണ് ഇപ്പോള്‍ ലഭിക്കുന്ന വിവരം.

മമ്മൂട്ടിയെ നായകനാക്കി ബി.ഉണ്ണികൃഷ്ണന്‍ സംവിധാനം ചെയ്യുന്ന ചിത്രം ഒരു ഇന്‍വസ്റ്റിഗേഷന്‍ ത്രില്ലറാണ്. യഥാര്‍ഥ സംഭവത്തെ ആസ്പദമാക്കിയാണ് ചിത്രമെന്നും റിപ്പോര്‍ട്ടുകളുണ്ട്.

മമ്മൂട്ടിക്കൊപ്പം മഞ്ജു വാരിയര്‍, ബിജു മേനോന്‍ എന്നിവരും ബി.ഉണ്ണികൃഷ്ണന്‍ ചിത്രത്തിലുണ്ടാകുമെന്നാണ് വിവരം.

മോഹന്‍ലാലിനെ കേന്ദ്ര കഥാപാത്രമാക്കിയുള്ള ആറാട്ടാണ് ഉണ്ണികൃഷ്ണന്റേതായി ഏറ്റവും ഒടുവില്‍ റിലീസ് ചെയ്തത്. തിയറ്ററുകളില്‍ അത്ര വലിയ വിജയമാകാന്‍ ആറാട്ടിന് സാധിച്ചില്ല.