‘അവരെല്ലാം എന്നെ വിട്ടുപോകുന്നത് പോലെ തോന്നി’; മലയാള സിനിമയില്‍ നിന്ന് വിട്ടുനിന്നതിനെ കുറിച്ച് ജയറാം

മലയാള സിനിമയില്‍ നിന്ന് ചെറിയൊരു ഇടവേളയെടുത്തതിനെ കുറിച്ച് മനസ്സുതുറന്ന് ജയറാം. 2019 ല്‍ പുറത്തിറങ്ങിയ പട്ടാഭിരാമനാണ് ജയറാമിന്റെ അവസാന ചിത്രം. പിന്നീട് മൂന്ന് വര്‍ഷത്തെ ഇടവേളയ്ക്ക് ശേഷമാണ് സത്യന്‍ അന്തിക്കാട് ചിത്രം മകള്‍ റിലീസ് ചെയ്തിരിക്കുന്നത്.

മലയാളത്തില്‍ നിന്ന് മനപ്പൂര്‍വ്വം ഇടവേളയെടുത്തതാണെന്ന് ജയറാം പറഞ്ഞു. ‘എന്നെ ഇഷ്ടപ്പെടുന്ന കുറച്ച് അമ്മമാര്‍, സഹോദരിമാര്‍, സഹോദരന്മാര്‍ അവരൊക്കെ എന്നെ വിട്ട് കുറച്ച് അകന്ന് പോകുന്നുണ്ടോ എന്ന് എനിക്ക് തോന്നിയിട്ടുണ്ടായിരുന്നു. കാരണം, പലപ്പോഴും അങ്ങനെ തോന്നിയ സമയങ്ങളിലൊക്കെ എനിക്ക് ഒരുപാട് പരാജയങ്ങള്‍ വന്നു,’

‘ഞാന്‍ ഇനി കുറേ കാലത്തേക്ക് സിനിമ ചെയ്യുന്നില്ല, പ്രത്യേകിച്ച് മലയാളം, എന്ന് തീരുമാനിച്ചു. മനസ്സിന് ഒരു സ്പാര്‍ക്കായി തോന്നുന്ന ഒരു സിനിമ എന്നെങ്കിലും ദൈവം കൊണ്ടുതരുമ്പോള്‍ അത് ചെയ്യാം എന്ന് എന്റെ പിള്ളേരോടും പറഞ്ഞു. ബെസ്റ്റ് ഐഡിയയാണ് അപ്പാ, അത് പോലുള്ള കഥകള്‍ വരുമ്പോള്‍ ചെയ്താല്‍ മതി. വല്ലപ്പോഴും തമിഴും തെലുങ്കും ചെയ്യാം എന്ന് അവരും പറഞ്ഞു,’ ജയറാം പറഞ്ഞു