സായി പല്ലവിക്ക് പിന്തുണയുമായി ധനുഷ്

നിതേഷ് തിവാരിയുടെ സംവിധാനത്തില്‍ ഒരുങ്ങിയ ‘രാമായണ’യില്‍ സീതയായി എത്തിയ സായ് പല്ലവിക്കെതിരായ വിമര്‍ശനങ്ങളില്‍ പ്രതികരണവുമായി നടന്‍ ധനുഷ്. സീതയുടെ വേഷം അവതരിപ്പിക്കാന്‍ സായ് പല്ലവിയേക്കാള്‍ മികച്ചൊരു താരം രാജ്യത്തുതന്നെ ഉണ്ടാകില്ലെന്നാണ് ധനുഷിന്റെ അഭിപ്രായം. ഇരുവരും ഒന്നിക്കുന്ന ‘ഓം’ എന്ന പുതിയ ചിത്രത്തിന്റെ പ്രീ റിലീസ് ചടങ്ങിലായിരുന്നു ധനുഷിന്റെ പ്രതികരണം.

‘സീതയുടെ വേഷത്തില്‍ സായ് പല്ലവിയെ അവതരിപ്പിച്ചതിനെക്കുറിച്ച് നിരവധി വിമര്‍ശനങ്ങളും ചര്‍ച്ചകളും നടക്കുന്നുണ്ട്. അതിന്റെ കാരണം എനിക്ക് മനസ്സിലാകുന്നില്ല. ഷൂട്ടിങ്ങിനിടയിലെ ഇടവേളകളില്‍ പോലും അവര്‍ പ്രാര്‍ഥിച്ചുകൊണ്ടിരിക്കുമായിരുന്നു. ദൈവത്തോട് അത്രയേറെ ഭക്തിയും ശുദ്ധമായ മനസ്സുമുള്ള വ്യക്തിയാണ് സായ്. അതീവസുന്ദരിയാണ്. ?ഗംഭീര അഭിനേത്രിയുമാണ്. ഇന്ത്യ മുഴുവന്‍ തിരഞ്ഞാലും സായ് പല്ലവിയെപ്പോലെ മറ്റൊരു സീതയെ കണ്ടെത്താനാകില്ല’ എന്നായിരുന്നു ധനുഷിന്റെ വാക്കുകള്‍.

സായ് പല്ലവിക്കൊപ്പമുള്ള മുന്‍കാല അനുഭവങ്ങളും ധനുഷ് ചടങ്ങില്‍ പങ്കുവെച്ചു. ‘മാരി 2’ എന്ന ചിത്രത്തിന്റെ ചിത്രീകരണത്തിനിടെയാണ് ആദ്യമായി സായ് പല്ലവിയെ പരിചയപ്പെടുന്നത്. അന്ന് വളരെ നിഷ്‌കളങ്കയും അധികം സംസാരിക്കാത്ത പ്രകൃതക്കാരിയുമായിരുന്നു താരമെന്ന് ധനുഷ് ഓര്‍ത്തെടുത്തു. എന്നാല്‍ ഒന്‍പത് വര്‍ഷങ്ങള്‍ക്കുശേഷം ‘ഓം’ സിനിമയുടെ സെറ്റില്‍ വീണ്ടും കണ്ടപ്പോള്‍ സായ് പല്ലവിയില്‍ വലിയ മാറ്റമാണ് കണ്ടതെന്നും അഭിനയത്തിലും സംസാരത്തിലും ശരീരഭാഷയിലുമെല്ലാം ആത്മവിശ്വാസം പ്രകടമായിരുന്നുവെന്നും അദ്ദേഹം പറഞ്ഞു.

‘ഓം’ സിനിമയില്‍ നിത്യ റെഡ്ഡി എന്ന സിബിഐ ഉദ്യോഗസ്ഥയുടെ വേഷത്തിലാണ് സായ് പല്ലവി എത്തുന്നത്. രക്തചന്ദനത്തിന്റെ അനധികൃത വ്യാപാരവുമായി ബന്ധപ്പെട്ട അന്വേഷണമാണ് ചിത്രത്തിന്റെ പ്രമേയം. ധനുഷിനൊപ്പം മമ്മൂട്ടിയും ചിത്രത്തില്‍ പ്രധാന വേഷത്തിലെത്തുന്നുണ്ട്. നവംബര്‍ 20നാണ് ചിത്രം തിയറ്ററുകളിലെത്തുന്നത്.