മരണക്കിണറിൽ നിന്ന് അധോലോകത്തിലേക്ക്? മമ്മൂട്ടിയുടെ പുതിയ ‘മേള’യുടെ കഥയെക്കുറിച്ച് ചില സൂചനകൾ

മരണക്കിണറിനുള്ളിൽ മോട്ടോർസൈക്കിളിൽ പാഞ്ഞിറങ്ങുന്ന അഭ്യാസി, ചുറ്റും ശ്വാസമടക്കിപ്പിടിച്ച് നിൽക്കുന്ന കാണികൾ, ഓരോ നിമിഷവും അപകടം പതിയിരിക്കുന്ന പ്രകടനം. 1980ൽ പുറത്തിറങ്ങിയ കെ.ജി. ജോർജിന്റെ ‘മേള’യിൽ മമ്മൂട്ടി അവതരിപ്പിച്ച വിജയന്റെ ലോകം ഇതായിരുന്നു. 46 വർഷങ്ങൾക്കിപ്പുറം അതേ പേരിൽ മമ്മൂട്ടി വീണ്ടും എത്തുമ്പോൾ, ഇത്തവണത്തെ കഥാപാത്രം ആരാണ്? സർക്കസ് കൂടാരത്തിനപ്പുറം അയാളുടെ ജീവിതത്തിൽ എന്തെല്ലാം സംഭവിക്കുന്നുണ്ടാകും?

പുതിയ ‘മേള’യുടെ ഫസ്റ്റ് ലുക്ക് പോസ്റ്ററിൽ കാണുന്നത് പഴയ ചിത്രത്തിലെ വിജയനെയല്ല. ചിതറിക്കിടക്കുന്ന സാധനങ്ങൾ നിറഞ്ഞ മുറിയിൽ കറുത്ത വസ്ത്രം ധരിച്ച് ഗൗരവത്തോടെ ഇരിക്കുന്ന മമ്മൂട്ടിയെയാണ്. സംവിധായകൻ നിതീഷ് സഹദേവ് ചിത്രം ഒരു മാസ് ആക്ഷൻ എന്റർടെയ്നറായിരിക്കുമെന്ന് വ്യക്തമാക്കിയിട്ടുണ്ട്. പ്രാദേശിക ഗുണ്ടയുടെ വേഷത്തിലാണ് മമ്മൂട്ടി എത്തുന്നതെന്ന വിവരവും പുറത്തുവന്നിട്ടുണ്ട്. അതിനാൽ പഴയ ചിത്രത്തിലെ സർക്കസ് പശ്ചാത്തലവും പുതിയ ചിത്രത്തിലെ ഗുണ്ടാലോകവും എങ്ങനെയെങ്കിലും കൂട്ടിമുട്ടുമോ എന്നതാണ് ഉയരുന്ന കൗതുകം.

പുതിയ ചിത്രത്തിന്റെ ചിത്രീകരണം കോട്ടയത്തെ സർക്കസ് മൈതാനത്ത് പുരോഗമിക്കുന്നതും ഈ ചോദ്യങ്ങൾക്ക് വഴിയൊരുക്കുന്നു. മരണക്കിണറിലെ രംഗങ്ങൾ ഉൾപ്പെടെ ചിത്രീകരിച്ചതായാണ് റിപ്പോർട്ട്. പഴയ ‘മേള’യിൽ മോട്ടോർസൈക്കിൾ അഭ്യാസിയായിരുന്ന വിജയന്റെ ജീവിതം സർക്കസുമായി ചേർന്നുനിന്നെങ്കിൽ, പുതിയ ചിത്രത്തിൽ സർക്കസ് ഒരു പ്രധാന സംഭവത്തിന്റെ പശ്ചാത്തലമാകുമോ? അതോ മമ്മൂട്ടിയുടെ കഥാപാത്രത്തിന്റെ ജീവിതത്തെ മാറ്റിമറിക്കുന്ന ഏതെങ്കിലും സംഭവത്തിലേക്കുള്ള വഴിയാകുമോ? ഇതെല്ലാം ഇപ്പോൾ ഊഹങ്ങൾ മാത്രമാണ്.

പഴയ ‘മേള’യുടെ കഥ പുതിയ ചിത്രത്തിലും ആവർത്തിക്കുമെന്ന് കരുതാൻ ഇപ്പോൾ കാരണമില്ല. പഴയ ചിത്രത്തിന്റെ പേരുമായി യാദൃച്ഛികമായ ബന്ധം മാത്രമാണുള്ളതെന്ന് സംവിധായകൻ നിതീഷ് സഹദേവ് നേരത്തേ വ്യക്തമാക്കിയിരുന്നു. മമ്മൂട്ടിയുടെ പുതിയ കഥാപാത്രത്തിന്റെ പ്രഭാവമാണ് പേര് തിരഞ്ഞെടുക്കാൻ പ്രേരിപ്പിച്ചതെന്നും അദ്ദേഹം പറഞ്ഞിട്ടുണ്ട്. അതുകൊണ്ട് പഴയ ചിത്രത്തിന്റെ കഥയുടെ തുടർച്ചയോ പുനരാവിഷ്കാരമോ എന്നതിലുപരി, അതേ പേരിൽ തികച്ചും വ്യത്യസ്തമായൊരു ലോകം സൃഷ്ടിക്കാനാണ് അണിയറപ്രവർത്തകരുടെ ശ്രമമെന്ന് കരുതാം.

മമ്മൂട്ടി കമ്പനിയുടെ ബാനറിൽ ഒരുങ്ങുന്ന ചിത്രം നിതീഷ് സഹദേവും അനുരാജ് ഒ.ബിയും ചേർന്നാണ് രചിക്കുന്നത്. ജിംഷി ഖാലിദ് ഛായാഗ്രഹണവും വിഷ്ണു വിജയ് സംഗീതവും നിർവഹിക്കുന്നു.