ഒരു കുടുംബം, പിന്നിൽ ദുരൂഹതകൾ; ദിലീഷ് പോത്തന്റെ ‘ഭൗമ’യിൽ സംഭവിക്കുന്നതെന്ത്?

ചുവന്ന ആകാശം, ചുറ്റും കൂറ്റൻ മരത്തടികൾ, നടുവിൽ ടോർച്ച് തെളിച്ചുനിൽക്കുന്ന ദിലീഷ് പോത്തൻ. ‘ഭൗമ’യുടെ പുതിയ പോസ്റ്റർ മുന്നോട്ടുവയ്ക്കുന്ന ദൃശ്യം അത്ര ലളിതമല്ല. നേരത്തേ പുറത്തുവന്ന ആദ്യ പോസ്റ്ററിൽ നീണ്ട തീൻമേശയ്ക്കു ചുറ്റുമിരുന്ന 16 പേരെയാണ് കണ്ടതെങ്കിൽ, പുതിയ പോസ്റ്ററിൽ കാണുന്നത് തികച്ചും വ്യത്യസ്തമായൊരു ലോകമാണ്. ഈ രണ്ടു ദൃശ്യങ്ങളും തമ്മിൽ എന്തെങ്കിലും ബന്ധമുണ്ടോ? ഒരു കുടുംബത്തിന്റെ രഹസ്യങ്ങളിലേക്കാണോ ചിത്രം പ്രേക്ഷകരെ കൊണ്ടുപോകുന്നത്?

റെജിൻ എസ്. ബാബു രചനയും സംവിധാനവും നിർവഹിക്കുന്ന ‘ഭൗമ’ ഒരു ദുരൂഹതാ ചിത്രമായാണ് ഒരുങ്ങുന്നത്. ആദ്യ പോസ്റ്ററിൽ കുടുംബത്തിലെ ഓരോരുത്തരുടെയും മുഖഭാവങ്ങളും തീൻമേശയിലെ അസാധാരണമായ ക്രമീകരണങ്ങളും ശ്രദ്ധ നേടിയിരുന്നു. എല്ലാവരും ഒരേ മേശയ്ക്കു ചുറ്റുമുണ്ടെങ്കിലും അവരുടെ ഇടയിൽ പറയാത്ത ചില കാര്യങ്ങളുണ്ടെന്ന തോന്നലാണ് ആ ചിത്രം നൽകിയത്. പുതിയ പോസ്റ്ററാകട്ടെ കഥയുടെ പശ്ചാത്തലത്തെക്കുറിച്ച് കൂടുതൽ ചോദ്യങ്ങൾ ഉയർത്തുന്നു. ഇവരെ ബന്ധിപ്പിക്കുന്ന രഹസ്യം എന്തായിരിക്കും എന്നതാണ് ഇപ്പോഴത്തെ കൗതുകം.

പുതിയ പോസ്റ്ററിൽ ടോർച്ചുമായി നിൽക്കുന്ന ദിലീഷ് പോത്തന്റെ കഥാപാത്രം എന്തോ അന്വേഷിക്കുകയാണോ? അതോ അയാൾ എത്തിപ്പെട്ടിരിക്കുന്നത് മറ്റുള്ളവർക്ക് അറിയാത്ത ഒരു സ്ഥലത്താണോ? പോസ്റ്ററിലെ മരത്തടികളും ചുവന്ന ആകാശവും മാത്രം കണ്ട് കഥയെക്കുറിച്ച് ഉറപ്പിച്ചു പറയാനാകില്ലെങ്കിലും, ചിത്രത്തിന്റെ നിഗൂഢമായ ദൃശ്യഭാഷ ശ്രദ്ധേയമാണ്. ആദ്യ പോസ്റ്ററിലെ കുടുംബവും പുതിയ പോസ്റ്ററിലെ ഏകാന്തമായ ഈ ദൃശ്യവും തമ്മിലുള്ള ബന്ധം സിനിമയുടെ കഥയിൽ നിർണായകമാകുമോ എന്ന ചോദ്യം അവശേഷിക്കുന്നു.

ദിലീഷ് പോത്തനൊപ്പം വിനീത്, സാഗർ സൂര്യ, അദിതി ബാലൻ, ലെന, മധുപാൽ തുടങ്ങി വലിയൊരു താരനിരയും ചിത്രത്തിലുണ്ട്. ആറ്റസ് ഫിലിംസിന്റെ ബാനറിൽ ബസം കാദിയാർ നിർമിക്കുന്ന ചിത്രത്തിന് ശരൺ വേലായുധനാണ് ഛായാഗ്രഹണം. ക്രിസ്റ്റോ സേവ്യറാണ് സംഗീതം. മലയാളത്തിനു പുറമേ തമിഴ്, തെലുങ്ക്, ഹിന്ദി, കന്നഡ ഭാഷകളിലും ചിത്രം എത്തും.