കഥ തിരിച്ചുവിടാൻ യുക്തിയെ ബലികഴിച്ചോ? ‘പ്രഥമദൃഷ്ട്യാ കുറ്റക്കാറി’ലെ ആ സുപ്രധാന ലൂപ്ഹോൾ ചർച്ചയാക്കി പ്രേക്ഷകർ

ഷഹദ് നിലമ്പൂർ സംവിധാനം ചെയ്ത് പാർവതി തിരുവോത്ത് പ്രധാന വേഷത്തിലെത്തിയ ഏറ്റവും പുതിയ ഇൻവെസ്റ്റിഗേറ്റീവ് ത്രില്ലർ ചിത്രം പ്രഥമദൃഷ്ട്യാ കുറ്റക്കാർ ഒടിടി റിലീസിന് പിന്നാലെ സൈബർ ഇടങ്ങളിൽ സജീവ ചർച്ചയാവുകയാണ്. തിയേറ്ററുകളിൽ വൻ വിജയം കൊയ്ത ചിത്രമാണെങ്കിലും, ഇതിലെ ഒരു സുപ്രധാന രംഗത്തിലെ യുക്തിയില്ലായ്മയാണ് ഇപ്പോൾ സിനിമാ ഗ്രൂപ്പുകളിൽ സംവാദങ്ങൾക്ക് വഴിവെച്ചിരിക്കുന്നത്. കഥാ ഗതിയിലെ ട്വിസ്റ്റിന് വേണ്ടി തിരക്കഥാകൃത്തുക്കൾ ബോധപൂർവ്വം ചില വലിയ ലൂപ്ഹോളുകൾ അവഗണിച്ചതാണോ എന്നാണ് പ്രേക്ഷകർ ഇപ്പോൾ ഉയർത്തുന്ന പ്രധാന ചോദ്യം.

ചിത്രത്തിൽ അസീസ് നെടുമങ്ങാട് അവതരിപ്പിക്കുന്ന പോലീസ് ഉദ്യോഗസ്ഥൻ സ്റ്റേഷനിലേക്ക് കടന്നുവരുമ്പോൾ, സിദ്ധാർത്ഥ് ഭരതന്റെ കഥാപാത്രം നിൽക്കുന്നത് കാണുന്ന ഒരു രംഗമുണ്ട്. പിന്നീട് ഈ വിവരം വിജയരാഘവന്റെ കഥാപാത്രത്തോട് വെളിപ്പെടുത്തുമ്പോൾ, ഉണ്ണിമായ പ്രസാദിന്റെ കഥാപാത്രം അതിനെ അതീവ സമർത്ഥമായി പ്രതിരോധിക്കുകയാണ് ചെയ്യുന്നത്. ആ സമയത്ത് സ്റ്റേഷനിൽ താൻ ഒറ്റയ്ക്കായിരുന്നുവെന്നും മറ്റുള്ളവരെല്ലാം പെട്രോളിങ്ങിന് പോയതാണെന്നും പറഞ്ഞ് വിജയരാഘവനെ അവർ വിശ്വസിപ്പിക്കുന്നുമുണ്ട്. സിനിമയുടെ ഗതിയെ തന്നെ മാറ്റിമറിക്കുന്ന ഒരു നിർണ്ണായക സന്ദർഭമായിരുന്നു ഇത്.
എന്നാൽ ഈ രംഗത്ത് സംഭവിച്ച വലിയൊരു തിരക്കഥാ അശ്രദ്ധയാണ് സിനിമാ ആസ്വാദകർ ഇപ്പോൾ ചൂണ്ടിക്കാണിക്കുന്നത്. അസീസ് നെടുമങ്ങാടിന്റെ കഥാപാത്രം ഒറ്റയ്ക്കല്ല സ്റ്റേഷനിലേക്ക് വരുന്നത്, അദ്ദേഹത്തോടൊപ്പം ഒരു ഡ്രൈവറും ഉണ്ടായിരുന്നു. സ്വാഭാവികമായും ആ ഡ്രൈവറും സിദ്ധാർത്ഥ് ഭരതനെ അവിടെ കണ്ടിട്ടുണ്ടാകുമെന്നത് ഉറപ്പാണ്. ആ ഡ്രൈവറെ മാത്രം സാക്ഷിയാക്കി ഒരു ചോദ്യം ചെയ്യൽ നടത്തിയിരുന്നെങ്കിൽ ഉണ്ണിമായയുടെ കള്ളങ്ങളെല്ലാം വളരെ എളുപ്പത്തിൽ പൊളിക്കാമായിരുന്നു.