‘സ്റ്റാർഡം വലിയൊരു ബാധ്യതയാണ്, മോഹൻലാലിനും രജിനികാന്തിനും ആ പരിമിതിയുണ്ട്’; തുറന്നുപറഞ്ഞ് വിജയരാഘവൻ

മലയാള സിനിമയിൽ അസാധ്യമായ വേഷപ്പകർച്ചകൾ കൊണ്ട് വിസ്മയിപ്പിച്ച നടനാണ് വിജയരാഘവൻ. കരിയറിൽ ഒരിക്കൽ പോലും സൂപ്പർസ്റ്റാർ പദവിക്ക് പിന്നാലെ ഓടാൻ താൻ ആഗ്രഹിച്ചിരുന്നില്ലെന്ന് വ്യക്തമാക്കുകയാണ് താരം. ഒരു അഭിമുഖത്തിൽ സംസാരിക്കവെ, അമിതമായ സ്റ്റാർഡം ഒരു നടന്റെ അഭിനയ സ്വാതന്ത്ര്യത്തെ എങ്ങനെയാണ് വിലങ്ങുതടിയാക്കി മാറ്റുന്നത് എന്ന് അദ്ദേഹം ചൂണ്ടിക്കാണിക്കുന്നു. കഥാപാത്രങ്ങളെ തിരഞ്ഞെടുക്കുന്നതിൽ തനിക്ക് യാതൊരുവിധ പരിമിതികളും ഇല്ലെന്നും എന്നാൽ സൂപ്പർതാരങ്ങൾക്ക് അത്തരം വലിയ അതിർവരമ്പുകൾ ഉണ്ടെന്നും വിജയരാഘവൻ തുറന്നുപറഞ്ഞു.

സിനിമയിലെ സൂപ്പർതാരങ്ങളായ മോഹൻലാൽ, രജിനികാന്ത് എന്നിവരെ ഉദാഹരണമാക്കിയാണ് വിജയരാഘവൻ തന്റെ നിരീക്ഷണം പങ്കുവെച്ചത്. മോഹൻലാൽ ഒരു ഭിക്ഷക്കാരന്റെ വേഷം ചെയ്താൽ അത് പൂർണ്ണമായി ഉൾക്കൊള്ളാൻ കഴിയാത്ത ഒരു വലിയ വിഭാഗം പ്രേക്ഷകർ ഇവിടെയുണ്ടെന്ന് അദ്ദേഹം പറയുന്നു. അതുപോലെ തന്നെ തെന്നിന്ത്യൻ സൂപ്പർസ്റ്റാർ രജിനികാന്തിനെ പത്തുപേർ ചേർന്ന് ഓടിച്ചിട്ട് തല്ലുന്ന ഒരു രംഗം ചിന്തിക്കാൻ പോലും ആരാധകർക്ക് സാധിക്കില്ല. താരപദവി വളരുമ്പോൾ ഉണ്ടാകുന്ന ഇത്തരം പരിമിതികൾ തന്നെപ്പോലെയുള്ള അഭിനേതാക്കളെ ബാധിക്കാറില്ലെന്നും, ഏതു പ്രായത്തിലുള്ള വേഷവും ചെയ്യാൻ തനിക്ക് പൂർണ്ണ സ്വാതന്ത്ര്യമുണ്ടെന്നും അദ്ദേഹം കൂട്ടിച്ചേർത്തു.

നാടക പശ്ചാത്തലത്തിൽ നിന്ന് വന്നതുകൊണ്ട് തന്നെ എല്ലാത്തരം കഥാപാത്രങ്ങളും തനിക്ക് വഴങ്ങുമെന്നും, അനാവശ്യമായ താരഭാരങ്ങൾ തലയിലേറ്റാത്തത് കൊണ്ടാണ് ഒരു ആർട്ടിസ്റ്റ് എന്ന നിലയിൽ തനിക്ക് ഈ മികച്ച ഫ്രീഡം ലഭിക്കുന്നതെന്നും അദ്ദേഹം അഭിമുഖത്തിൽ ഓർമ്മിപ്പിച്ചു.