അഞ്ച് പതിറ്റാണ്ടിന് ശേഷം പഴയ ക്ലാസ്മുറിയിലേക്ക്; ലോ കോളജ് സഹപാഠികളെ കണ്ട് മമ്മൂട്ടി

നാൽപത്തിയഞ്ചും അമ്പതും വർഷം മുൻപ് ഒരുമിച്ചിരുന്ന് പഠിച്ചവർ, ഇന്ന് വീണ്ടും ഒരു കൂടിക്കാഴ്ചയിൽ. എറണാകുളം ഗവൺമെന്റ് ലോ കോളജിലെ തന്റെ ബാച്ചിന്റെ 50-ാം വാർഷികാഘോഷത്തിൽ പങ്കെടുക്കാൻ എത്തിയ മമ്മൂട്ടി, പഴയ സഹപാഠികളെ കണ്ടുമുട്ടിയ നിമിഷങ്ങൾ ഇപ്പോൾ സാമൂഹ്യമാധ്യമങ്ങളിൽ വൈറലാണ്.

1973 മുതൽ 1976 വരെയുള്ള ബാച്ചിന്റെ ഭാഗമായിരുന്നു മമ്മൂട്ടി. ഭാര്യ സുൽഫത്തിനൊപ്പമാണ് അദ്ദേഹം ചടങ്ങിൽ പങ്കെടുക്കാൻ എത്തിയത്. പഴയ സഹപാഠികൾക്കൊപ്പം സൊറ പറഞ്ഞും ഫോട്ടോകൾക്ക് പോസ് ചെയ്തും ഏറെ നേരം അദ്ദേഹം ചെലവഴിച്ചു. വർഷങ്ങൾക്ക് ശേഷമുള്ള ഈ കൂടിക്കാഴ്ചയിൽ പങ്കെടുത്തവരുടെ മുഖത്തെ സന്തോഷം വീഡിയോയിൽ വ്യക്തമായി കാണാം.

സിനിമയിലേക്ക് വരുന്നതിന് മുൻപ് അഭിഭാഷകനാകാൻ ആഗ്രഹിച്ചിരുന്ന ആളാണ് മമ്മൂട്ടി. എറണാകുളം മഹാരാജാസ് കോളജിൽ നിന്ന് ബിരുദം നേടിയ ശേഷം, ഇതേ ലോ കോളജിൽ നിന്നാണ് അദ്ദേഹം എൽഎൽബി പൂർത്തിയാക്കിയത്. കുറച്ചുകാലം അഭിഭാഷകവൃത്തിയിലും അദ്ദേഹം സജീവമായിരുന്നു.