‘ഇത് പ്രാങ്കാണെന്നാണ് ആദ്യം കരുതിയത്’; ബിഗ് ബോസിൽ നിന്ന് പെട്ടെന്നുള്ള പുറത്താകൽ, മനസുതുറന്ന് ഗായത്രി സുരേഷ്

ബിഗ് ബോസ് മലയാളം സീസൺ 8-ൽ ഏറെ പ്രതീക്ഷകളോടെ എത്തിയ ഗായത്രി സുരേഷിന്റെ യാത്ര തുടങ്ങി രണ്ട് ദിവസം തികയും മുമ്പേ അവസാനിക്കുമെന്ന് താരം പോലും കരുതിയിരുന്നില്ല. അപ്രതീക്ഷിതമായ സ്പോട്ട് എവിക്ഷനിലൂടെ പുറത്തായതിന് പിന്നാലെ സോഷ്യൽ മീഡിയയിൽ പങ്കുവച്ച വീഡിയോയിലാണ് ആ നിമിഷങ്ങളിലെ ഞെട്ടലും നിരാശയും ഗായത്രി തുറന്നുപറഞ്ഞത്.

ബിഗ് ബോസ് വീട്ടിൽ നിന്ന് പുറത്താക്കാനുള്ള തീരുമാനം അറിയിച്ചപ്പോഴും ആദ്യം ഗായത്രിക്ക് അത് വിശ്വസിക്കാനായില്ല. ഒരു പ്രാങ്ക് ആയിരിക്കുമെന്നാണ് കരുതിയത്. എന്നാൽ പുറത്തേക്കുള്ള വാതിലിനടുത്തെത്തിയതോടെയാണ് സംഭവം സത്യമായിരുന്നുവെന്ന് മനസ്സിലായതെന്ന് താരം പറയുന്നു. ഇത്രയും പെട്ടെന്ന് യാത്ര അവസാനിക്കുമെന്ന് പ്രതീക്ഷിച്ചിരുന്നില്ലെന്നും ഗായത്രി തുറന്നുപറഞ്ഞു.

വലിയ പ്രതീക്ഷകളോടെയാണ് ബിഗ് ബോസ് വീട്ടിലേക്ക് എത്തിയതെന്നും ഗായത്രി പറയുന്നു. എന്നാൽ തന്റെ ഗെയിം എന്താണെന്ന് പ്രേക്ഷകർക്ക് കാണിച്ചുതരാനുള്ള അവസരം പോലും ലഭിച്ചില്ലെന്നതാണ് താരത്തിന്റെ പ്രധാന നിരാശ. താൻ ദുർബലയായ മത്സരാർഥിയല്ലെന്നും കുറച്ചുകൂടി സമയം ലഭിച്ചിരുന്നെങ്കിൽ കൂടുതൽ നന്നായി കളിക്കാൻ കഴിയുമായിരുന്നുവെന്നും ഗായത്രി പ്രതികരണത്തിൽ വ്യക്തമാക്കി.

പുറത്താകലിലേക്ക് നയിച്ച സംഭവങ്ങളും താരം വിശദീകരിക്കുന്നുണ്ട്. റിനിയെ പുറത്താക്കണമെന്ന നിലപാടിലായിരുന്നു പലരും. എന്നാൽ ക്യാപ്റ്റൻ ജസീലാ പർവീൻ തന്റെ പേരാണ് മുന്നോട്ടുവച്ചത്. പിന്നീട് ആർജെ അഞ്ജലിയുടെ പേരും ചർച്ചയിലെത്തിയെങ്കിലും അഞ്ജലിക്ക് സംസാരിക്കാൻ അവസരം ലഭിച്ചതിന് പിന്നാലെയാണ് തന്റെ പുറത്താകൽ തീരുമാനമായതെന്നും ഗായത്രി പറഞ്ഞു.

ബിഗ് ബോസ് വീട്ടിൽ എല്ലാവരോടും സൗഹൃദപരമായാണ് പെരുമാറിയതെന്നും ഗായത്രി പറയുന്നു. അതുകൊണ്ടുതന്നെ തന്നെ പുറത്താക്കാനുള്ള തീരുമാനം കൂടുതൽ വേദനിപ്പിച്ചെന്നും താരത്തിന്റെ വാക്കുകളിൽ നിന്ന് വ്യക്തമാണ്. ഷോയിൽ നിന്ന് പുറത്തായെങ്കിലും തനിക്ക് ലഭിക്കുന്ന പിന്തുണയിൽ സന്തോഷമുണ്ടെന്നും ഗായത്രി ആരാധകരോട് നന്ദി അറിയിച്ചു.

ബിഗ് ബോസ് മലയാളത്തിന്റെ ചരിത്രത്തിലെ തന്നെ ഏറ്റവും വേഗമേറിയ പുറത്താകലുകളിലൊന്നായി ഗായത്രിയുടെ എവിക്ഷൻ മാറിയിരിക്കുകയാണ്.