മാത്യു തോമസിനെ മലയാള സിനിമ ഒതുക്കുകയാണോ? സോഷ്യൽ മീഡിയയിലെ ചർച്ചകൾക്ക് പിന്നിലെ യാഥാർത്ഥ്യം!

മലയാള സിനിമയിൽ വളരെ ചുരുങ്ങിയ കാലം കൊണ്ട് തന്റേതായ ഇടം കണ്ടെത്തിയ യുവനടൻ മാത്യു തോമസിനെ സിനിമയിൽ നിന്നും ചിലർ ആസൂത്രിതമായി ഒതുക്കാൻ ശ്രമിക്കുകയാണോ എന്ന ചോദ്യവുമായി സോഷ്യൽ മീഡിയ. ‘കുമ്പളങ്ങി നൈറ്റ്സ്’, ‘തണ്ണീർമത്തൻ ദിനങ്ങൾ’ തുടങ്ങിയ സൂപ്പർഹിറ്റ് ചിത്രങ്ങളിലൂടെ പ്രേക്ഷക ഹൃദയം കീഴടക്കിയ മാത്യുവിനെ, കഴിവുള്ള യുവ സംവിധായകർ പോലും പുതിയ ചിത്രങ്ങളിലേക്ക് ക്ഷണിക്കാതെ തഴയുന്നുവെന്നാണ് ആരാധകരുടെ പരാതി. മാത്യുവിനൊപ്പം കരിയർ ആരംഭിച്ച നസ്‌ലൻ വലിയ വിജയങ്ങളുമായി മുന്നേറുമ്പോൾ, മാത്യുവിന് നല്ല കഥാപാത്രങ്ങൾ ലഭിക്കാത്തതിന് പിന്നിൽ ഇൻഡസ്ട്രിക്കുള്ളിലെ ‘ഗ്രൂപ്പിസം’ ആണോ അതോ ബോധപൂർവ്വമുള്ള നീക്കങ്ങളാണോ എന്ന സംശയം സിനിമാ പ്രേമികൾക്കിടയിൽ ശക്തമാകുന്നുണ്ട്.

എന്നാൽ ഈ ചർച്ചകളിൽ വലിയൊരു വിഭാഗം സിനിമാ നിരീക്ഷകർ വിയോജിപ്പ് പ്രകടിപ്പിക്കുന്നു. തുടക്കകാലത്ത് മാത്യു അവതരിപ്പിച്ച ഒരേ രീതിയിലുള്ള കഥാപാത്രങ്ങളാണ് താരത്തിന്റെ കരിയറിന് ചെറിയൊരു മന്ദത സമ്മാനിച്ചതെന്നും, അല്ലാതെ ആരും ഒതുക്കാൻ ശ്രമിക്കുന്നതല്ലെന്നുമാണ് വിലയിരുത്തൽ. മാത്രമല്ല, ലോകേഷ് കനകരാജിന്റെ വിജയ് ചിത്രം ‘ലിയോ’യിലൂടെ തമിഴിൽ വരെ അരങ്ങേറ്റം കുറിച്ച മാത്യുവിന് അവസരങ്ങളുടെ കുറവില്ല.
കഥാപാത്രങ്ങളുടെ തിരഞ്ഞെടുപ്പിൽ കൂടുതൽ ശ്രദ്ധ പുലർത്തിയാൽ മാത്യു തോമസിന് ശക്തമായ ഒരു തിരിച്ചുവരവ് നടത്താൻ സാധിക്കുമെന്നാണ് പൊതുവെയുള്ള വിലയിരുത്തൽ