മോഹൻലാലിൻ്റെ ‘മാമ്പറയ്ക്കൽ അഹമ്മദ് അലി’ ലുക്ക് തരംഗമാകുന്നു; പിന്നിൽ കോൺസെപ്റ്റ് ആർട്ടിസ്റ്റ് സേതു ശിവാനന്ദൻ

തിയേറ്ററുകളിൽ ആവേശം വിതറി മുന്നേറുന്ന വൈശാഖ്-പൃഥ്വിരാജ് ചിത്രം ‘ഖലീഫ’യിലെ മോഹൻലാലിന്റെ സ്പെഷ്യൽ ലുക്ക് സോഷ്യൽ മീഡിയയിൽ വൈറലാകുന്നു. ചിത്രത്തിൽ മാമ്പറയ്ക്കൽ അഹമ്മദ് അലി എന്ന കരുത്തുറ്റ കഥാപാത്രത്തിന്റെ കോൺസെപ്റ്റ് ഡിസൈൻ അണിയറപ്രവർത്തകർ പുറത്തുവിട്ടു. പ്രശസ്ത കോൺസെപ്റ്റ് ആർട്ടിസ്റ്റും സ്പെഷ്യൽ ഇഫക്റ്റ്സ് വിദഗ്ധനുമായ സേതു ശിവാനന്ദനാണ് ഈ വേറിട്ട ലുക്കിന് പിന്നിൽ.

നരച്ച മുടിയും താടിയും, സ്റ്റൈലിഷ് കൂളിംഗ് ഗ്ലാസും, കഴുത്തിലെ വലിയ മാലയും ലോക്കറ്റുമായി മാസ്സ് ലുക്കിലാണ് മോഹൻലാൽ ചിത്രത്തിലുള്ളത്. റിലീസ് ദിനത്തിൽ തന്നെ ചിത്രത്തിന്റെ രണ്ടാം ഭാഗമായ ‘ഖലീഫ 2: ദി ലെഗസി’ പ്രഖ്യാപിച്ചതോടെ പ്രേക്ഷകരുടെ ആവേശം ഇരട്ടിച്ചിരിക്കുകയാണ്. ആദ്യഭാഗത്തിൽ അതിഥി വേഷത്തിലെത്തിയ മോഹൻലാലിന്റെ മാമ്പറയ്ക്കൽ അഹമ്മദ് അലി എന്ന കഥാപാത്രത്തെ കേന്ദ്രീകരിച്ചായിരിക്കും രണ്ടാം ഭാഗം ഒരുങ്ങുന്നത്.

ഒടിയൻ, ബറോസ് തുടങ്ങിയ വൻകിട ചിത്രങ്ങളുടെ ഭാഗമായിട്ടുള്ള സേതു ശിവാനന്ദൻ ഒരുക്കിയ ഈ പുതിയ കോൺസെപ്റ്റ് ആർട്ട് ഇതിനോടകം തന്നെ ആരാധകർ ഏറ്റെടുത്തു കഴിഞ്ഞു.