മമ്മൂട്ടി-മോഹന്‍ലാല്‍-മഹേഷ് നാരായണന്‍ ചിത്രം; ഷൂട്ടിങ് ആരംഭിച്ചു, ഏറ്റവും പുതിയ വിവരങ്ങള്‍

മമ്മൂട്ടിയും മോഹന്‍ലാലും 11 വര്‍ഷത്തിനു ശേഷം ഒന്നിക്കുന്ന സിനിമയുടെ ചിത്രീകരണം ശ്രീലങ്കയില്‍ ആരംഭിച്ചു. മഹേഷ് നാരായണന്‍ സംവിധാനം ചെയ്യുന്ന ബിഗ് ബജറ്റ് ചിത്രത്തില്‍ കുഞ്ചാക്കോ ബോബനും ഫഹദ് ഫാസിലും ശ്രദ്ധേയമായ വേഷങ്ങളില്‍ എത്തും. നയന്‍താരയാണ് നായിക.

നവംബര്‍ 17 നാണ് ചിത്രീകരണം ആരംഭിച്ചത്. സിനിമയുടെ ഷൂട്ടിങ്ങിനു ഉപയോഗിക്കുന്ന ക്ലാപ്പ് ബോര്‍ഡിന്റെ ചിത്രമാണ് സോഷ്യല്‍ മീഡിയയില്‍ ഇപ്പോള്‍ വൈറലായിരിക്കുന്നത്. ‘ആന്റോ ജോസഫ് ഫിലിം കമ്പനി അവതരിപ്പിക്കുന്ന മമ്മൂട്ടി-മോഹന്‍ലാല്‍-മഹേഷ് നാരായണന്‍ ചിത്രം’ എന്നാണ് ക്ലാപ്പ് ബോര്‍ഡിലെ ‘AJFC_MMMN’ എന്ന എഴുത്തുകൊണ്ട് അര്‍ത്ഥമാക്കിയിരിക്കുന്നത്. മമ്മൂട്ടിക്കും മോഹന്‍ലാലിനും തുല്യ വേഷമെന്നാണ് ക്ലാപ്പ് ബോര്‍ഡിലെ എഴുത്തില്‍ നിന്ന് വ്യക്തമാകുന്നതെന്ന് ആരാധകര്‍ പറയുന്നു.

മോഹന്‍ലാലാണ് ഭദ്രദീപം കൊളുത്തിയത്. കോ പ്രൊഡ്യൂസര്‍മാരായ സുഭാഷ് ജോര്‍ജ് മാനുവല്‍ സ്വിച്ച് ഓണും സി.ആര്‍.സലിം ആദ്യ ക്ലാപ്പും നിര്‍വഹിച്ചു. രാജേഷ് കൃഷ്ണ, സലിം ഷാര്‍ജ, അനുര മത്തായി, തേജസ് തമ്പി എന്നിവരും തിരി തെളിയിച്ചു.

മഹേഷ് തന്നെയാണ് കഥയും തിരക്കഥയും. ബോളിവുഡിലെ പ്രശസ്തനായ സിനിമാട്ടോഗ്രഫര്‍ മനുഷ് നന്ദനാണ് ഛായാഗ്രഹണം. സംഗീതം സുഷിന്‍ ശ്യാം ആണ്.