‘ഇമ്മാതിരി ചോദ്യങ്ങള്‍ ചോദിച്ചാല്‍ എല്ലാം വലിച്ചെടുത്ത് ദൂരെ കളയും ഞാന്‍’; അവതാരകന് കണക്കിനു കൊടുത്ത് ശരണ്യ (വീഡിയോ)

ബിഗ് ബോസ് മലയാളം സീസണ്‍ 6 ലെ ശ്രദ്ധിക്കപ്പെട്ട മത്സരാര്‍ഥികളില്‍ ഒരാളാണ് നടിയും മോഡലുമായ ശരണ്യ ആനന്ദ്. കഴിഞ്ഞ ആഴ്ചയിലെ എവിക്ഷനിലാണ് ശരണ്യ ബിഗ് ബോസില്‍ നിന്ന് പുറത്തായത്. സമീപകാലത്ത് ബിഗ് ബോസുമായി ബന്ധപ്പെട്ട് നടക്കുന്ന വിവാദങ്ങളില്‍ ശക്തമായി പ്രതികരിച്ചിരിക്കുകയാണ് താരം ഇപ്പോള്‍.

ബിഗ് ബോസ് മലയാളം സീസണ്‍ 5 ലെ വിജയിയായ അഖില്‍ മാരാര്‍ നടത്തിയ പരാമര്‍ശത്തെ കുറിച്ച് അവതാരകന്‍ ചോദിച്ചപ്പോള്‍ ശരണ്യ പൊട്ടിത്തെറിക്കുകയായിരുന്നു. സ്ത്രീകള്‍ വഴങ്ങി കൊടുത്താണ് ബിഗ് ബോസില്‍ കയറുന്നത് എന്ന തരത്തില്‍ വിവാദ പ്രസ്താവനയാണ് അഖില്‍ നടത്തിയത്. ഇതേ കുറിച്ച് ചോദിച്ചപ്പോള്‍ അവതാരകനു കണക്കിനു മറുപടി കൊടുത്തു ശരണ്യ.

‘ ഈ കാര്യം നിങ്ങള്‍ക്ക് ചോദിക്കണമെങ്കില്‍ നേരെ പോയി അങ്ങേരോട് ചോദിച്ചാല്‍ മതി. ഇങ്ങനെ ചുമ്മാ വേഷം കെട്ടുള്ള കാര്യങ്ങള്‍ക്ക് എന്റെ പേര് വലിച്ചിട്ടാല്‍ ഇതുപോലെ ആകില്ല ഞാന്‍ സംസാരിക്കുക. എല്ലാം വലിച്ചെടുത്ത് ദൂരെ കളയും ഞാന്‍,’ ശരണ്യ പറഞ്ഞു.