ആവേശം 150 കോടി ക്ലബിലേക്ക്; ഒടിടി റിലീസും പ്രഖ്യാപിച്ചു

ഏപ്രില്‍ 11 നു തിയറ്ററുകളിലെത്തിയ ഫഹദ് ഫാസില്‍ ചിത്രം ആവേശം 150 കോടി ക്ലബിലേക്ക്. റിലീസ് ചെയ്ത് 26 ദിവസങ്ങള്‍ പൂര്‍ത്തിയാകുമ്പോഴാണ് ആവേശം 150 കോടി ക്ലബിനു തൊട്ടടുത്ത് എത്തിയിരിക്കുന്നത്. 26-ാം ദിവസവും ഒരു കോടിയില്‍ അധികം കളക്ട് ചെയ്യാന്‍ ചിത്രത്തിനു സാധിച്ചു.

ഇന്ത്യയില്‍ നിന്ന് 93.9 കോടിയും ഓവര്‍സീസില്‍ നിന്ന് 53 കോടിയും ആവേശം ഇതിനോടകം നേടി കഴിഞ്ഞു. സാക്‌നില്‍ക് റിപ്പോര്‍ട്ട് പ്രകാരം ആവേശത്തിന്റെ വേള്‍ഡ് വൈഡ് കളക്ഷന്‍ 146.9 കോടിയിലേക്ക് എത്തി. 30 കോടി മാത്രമാണ് ചിത്രത്തിന്റെ ബജറ്റ്. അടുത്ത നാലോ അഞ്ചോ ദിവസം കൊണ്ട് ആവേശം 150 കോടി ക്ലബില്‍ ഇടം പിടിക്കും.

അതേസമയം ആവേശം ഒ.ടി.ടി പ്ലാറ്റ്‌ഫോമിലേക്കും എത്തുകയാണ്. മേയ് ഒന്‍പതിനാണ് ചിത്രത്തിന്റെ ഒ.ടി.ടി. റിലീസ്. ആമസോണ്‍ പ്രൈമിലാണ് ആവേശത്തിന്റെ ഒ.ടി.ടി സ്ട്രീമിങ്. ജിതു മാധവന്‍ സംവിധാനം ചെയ്ത ആവേശത്തില്‍ ആശിഷ് വിദ്യാര്‍ഥി, മന്‍സൂര്‍ അലി ഖാന്‍, സജിന്‍ ഗോപു തുടങ്ങിയവരും അഭിനയിച്ചിട്ടുണ്ട്.