കെജിഎഫിനോട് മുട്ടാന്‍ വിജയ് റെഡി ! ബീസ്റ്റ് വരുന്നു, ആരാധകര്‍ ആവേശത്തില്‍

ആരാധകര്‍ ഏറെ പ്രതീക്ഷകളോടെ കാത്തിരിക്കുന്ന രണ്ട് ബിഗ് ബജറ്റ് ചിത്രങ്ങള്‍ ബോക്‌സ്ഓഫീസില്‍ പോരാട്ടത്തിനൊരുങ്ങുന്നു. ഇളയ ദളപതി വിജയ് നായകനാകുന്ന ‘ബീസ്റ്റി’ന്റെ റിലീസ് തിയതി പ്രഖ്യാപിച്ചു. ഏപ്രില്‍ 13 ന് വിഷു റിലീസായി ബീസ്റ്റ് തിയറ്ററുകളിലെത്തും.

ഏറെ ആരാധകരുള്ള മറ്റൊരു ചിത്രം കെജിഎഫ് ചാപ്റ്റര്‍ 2 ഏപ്രില്‍ 14 നാണ് തിയറ്ററുകളിലെത്തുക. കെജിഎഫിലെ റോക്കി ഭായിയും ബീസ്റ്റിലെ വിജയിയും ബോക്‌സ്ഓഫീസില്‍ ഏറ്റുമുട്ടുമ്പോള്‍ തീ പാറുമെന്ന് ഉറപ്പ്.

ഡോക്ടറിന് ശേഷം നെല്‍സണ്‍ ദിലീപ്കുമാര്‍ സംവിധാനം ചെയ്യുന്ന ചിത്രത്തില്‍ പൂജ ഹെഗ്ഡെയാണ് നായിക. ഒന്‍പത് വര്‍ഷത്തിന് ശേഷം പൂജ ചെയ്യുന്ന തമിഴ് ചിത്രമാണ് ബീസ്റ്റ്. സണ്‍ പിക്‌ച്ചേഴ്‌സുമായുള്ള നാലാമത്തെ വിജയ് ചിത്രമാണ് ഇത്. ‘വേട്ടൈക്കാരന്‍’, ‘സുറ’, ‘സര്‍ക്കാര്‍’ എന്നീ ചിത്രങ്ങളാണ് ഇതിന് മുമ്പ് സണ്‍ പിക്‌ച്ചേഴ്‌സ് നിര്‍മ്മിച്ച വിജയ് ചിത്രങ്ങള്‍.