സന്ദീപ് പ്രദീപ് നായകനാകുന്ന ‘കോസ്മിക് സാംസൺ’; ഫസ്റ്റ് ലുക്ക് പോസ്റ്റർ പുറത്തുവിട്ട് അൽഫോൺസ് പുത്രൻ, ചിത്രം നവംബർ 27-ന് തിയേറ്ററുകളിലേക്ക്

മലയാളി പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന പുതിയ ചിത്രമായ ‘കോസ്മിക് സാംസൺ’ ഔദ്യോഗിക റിലീസ് തീയതി പ്രഖ്യാപിച്ചു. ചിത്രം 2026 നവംബർ 27-ന് ലോകമെമ്പാടുമുള്ള തിയേറ്ററുകളിലെത്തും. പ്രശസ്ത സംവിധായകൻ അൽഫോൺസ് പുത്രൻ സോഷ്യൽ മീഡിയ അക്കൗണ്ട് വഴി ചിത്രത്തിന്റെ ആകർഷകമായ ഫസ്റ്റ് ലുക്ക് പോസ്റ്റർ പങ്കുവെച്ചുകൊണ്ടാണ് ഈ വിവരം പുറത്തുവിട്ടത്.

‘മിന്നൽ മുരളി’ ഉൾപ്പെടെയുള്ള സൂപ്പർഹിറ്റ് ചിത്രങ്ങൾ സമ്മാനിച്ച പ്രമുഖ നിർമ്മാണ കമ്പനിയായ വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോളാണ് ഈ ചിത്രം നിർമ്മിക്കുന്നത്. ചിത്രത്തിന്റെ സഹനിർമ്മാണം നിർവ്വഹിക്കുന്നത് ഡി ഗ്രൂപ്പിന്റെ ബാനറിൽ മാനുവൽ ക്രൂസ് ഡാർവിനാണ്. ബിനു ടി. എബ്രഹാമാണ് ചിത്രത്തിന്റെ എക്സിക്യൂട്ടീവ് പ്രൊഡ്യൂസർ.
യുവതാരം സന്ദീപ് പ്രദീപ് കേന്ദ്രകഥാപാത്രത്തെ അവതരിപ്പിക്കുന്ന ഈ ചിത്രം സംവിധാനം ചെയ്യുന്നത് അഭിജിത് ജോസഫ് ആണ്.

മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി എന്നീ അഞ്ച് ഭാഷകളിലായി ഒരുങ്ങുന്ന ഒരു പാൻ-ഇന്ത്യൻ ചിത്രമാണിത്. ഹോം സ്ക്രീൻ എന്റർടൈൻമെന്റ്സ് ആണ് ചിത്രം വിതരണത്തിന് എത്തിക്കുന്നത്.