ഒന്നുമല്ലാതിരുന്ന സമയത്തും കൂടെ നിര്‍ത്തി, തുറന്ന് പറഞ്ഞ് മമിത

ബെത്ലഹേം കുടുംബ യൂണിറ്റിന്റെ വിജയാഘോഷ വേദിയില്‍ വികാരഭരിതയായി നടി മമിത ബൈജു. തന്നില്‍ വിശ്വാസിച്ച സംവിധായകന്‍ ഗിരീഷ് എഡിയ്ക്ക് നന്ദി പറയുകയായിരുന്നു താരം. സൂപ്പര്‍ ശരണ്യ ചെയ്തതിന് പിന്നാലെ തന്നെ ബെത്ലേഹമിന്റെ കഥ തന്നോട് പറഞ്ഞിരുന്നുവെന്നും അന്നേ തനിക്ക് നായികയാകാന്‍ സാധിക്കുമെന്ന് ഗിരീഷ് എഡി വിശ്വസിച്ചിരുന്നുവെന്നും മമിത പറയുന്നു.

ഞാന്‍ ഇപ്പോഴും ഓര്‍ക്കുന്നുണ്ട്. സൂപ്പര്‍ ശരണ്യ കഴിഞ്ഞ ശേഷം, ഷൂട്ട് കഴിഞ്ഞതേയുള്ളൂ സിനിമ റിലീസായിട്ടില്ല. അപ്പോള്‍ എന്നോട് വേഗ് ആയിട്ട് ബെത്ലഹേം കുടുംബ യൂണിറ്റിന്റെ കഥ പറഞ്ഞിരുന്നു ഗിരീഷേട്ടന്‍. നീ ഈ കഥാപാത്രം ചെയ്താല്‍ നന്നായിരിക്കുമെന്ന് തോന്നുന്നുണ്ടെന്ന് അന്നേ പറഞ്ഞിരുന്നു. ഇന്നും എനിക്ക് അറിയില്ല എന്ത് വിചാരിച്ചിട്ടാണ് ഗിരീഷേട്ടന്‍ അന്ന് അത് പറഞ്ഞതെന്ന്. പക്ഷെ ഇപ്പോള്‍ ബെത്ലഹേം കുടുംബ യൂണിറ്റിന്റെ വിജയാഘോഷത്തില്‍ വന്ന് നില്‍ക്കുമ്പോള്‍ ഗിരീഷേട്ടനോട് ഒരുപാട് നന്ദിയുണ്ട്. എന്നില്‍ വിശ്വസിച്ചതിന് നന്ദി ഗിരീഷേട്ടാ” മമിത പറയുന്നു.

”ഒന്നും അല്ലാത്ത സമയത്ത് നമ്മളെ കൂടെ നിര്‍ത്തുന്നവര്‍ക്ക് നമ്മള്‍ കൊടുക്കേണ്ടൊരു വാല്യു ഉണ്ടല്ലോ. ഗിരീഷേട്ടന്‍ എനിക്ക് അങ്ങനെയാണ്. പ്രേമലു ആണെങ്കിലും ബെത്ലഹേം ആണെങ്കിലും. നായിക കഥാപാത്രം എന്നെക്കൊണ്ട് ചെയ്യാന്‍ പറ്റുമെന്ന വിശ്വാസം എനിക്കിലാത്തിരുന്ന കാലത്തും വിശ്വസിച്ചിരുന്ന ഗിരീഷേട്ടന്‍ ഒരുപാട് ഒരുപാട് നന്ദി” എന്നും മമിത ബൈജു പറയുന്നു.