വിവാഹം പരസ്യമാക്കത്തത് എന്ത്? കാരണം പറഞ്ഞ് അനുമോള്‍

ഇന്നലെയായിരുന്നു ബിഗ് ബോസ് മലയാളം സീസണ്‍ 7 വിജയിയും നടിയുമായ അനുമോള്‍ വിവാഹിതയായത്. തമിഴ്നാട് സ്വദേശിയും നടനും സോഷ്യല്‍ മീഡിയ ഇന്‍ഫ്‌ളുവന്‍സറുമായ ഭുവനേഷ് ആണ് അനുവിന് താലി ചാര്‍ത്തിയത്. കുടുംബാംഗങ്ങളുടെയും അടുത്ത സുഹൃത്തുക്കളുടെയും സാന്നിധ്യത്തില്‍ ഗുരുവായൂരില്‍ വച്ചായിരുന്നു വിവാഹം. നടനും കേന്ദ്രസഹമന്ത്രിയുമായ സുരേഷ് ഗോപി വിവാഹത്തിനെത്തി വധൂവരന്മാരെ അനുഗ്രഹിച്ചു.

വിവാഹവാര്‍ത്തകള്‍ കുറച്ചുദിവസമായി സമൂഹമാധ്യമങ്ങളില്‍ പ്രചരിക്കുന്നുണ്ടെങ്കിലും വിവാഹതീയതി എന്നാണെന്നോ വരന്‍ ആരാണെന്നോ പ്രഖ്യാപിക്കാതെ വിവാഹം രഹസ്യമായി സൂക്ഷിക്കുകയായിരുന്നു അനുമോള്‍. തിങ്കളാഴ്ച രാത്രിയോടെയാണ്, ‘ഒരു പുതിയ തുടക്കത്തിന്റെ ആഘോഷം’ എന്ന അടിക്കുറിപ്പോടെ പ്രീ വെഡ്ഡിംഗ് ആഘോഷങ്ങളുടെ ചിത്രങ്ങള്‍ പോലും അനുമോള്‍ സമൂഹമാധ്യമങ്ങളില്‍ പങ്കുവച്ചത്.

ഇപ്പോഴിതാ, വിവാഹശേഷം ഭുവനേശിനെ പരിചയപ്പെടുത്തി കൊണ്ടുള്ള ഒരു വീഡിയോ തന്റെ സോഷ്യല്‍ മീഡിയയില്‍ പങ്കുവച്ചിരിക്കുകയാണ് അനുമോള്‍. ‘ഭുവനേശ് തമിഴ്‌നാട് സ്വദേശിയാണ്, അധികം സംസാരിക്കാത്ത പ്രകൃതമാണ്,’ എന്നൊക്കെ വീഡിയോയില്‍ അനുമോള്‍ പറയുന്നു. ഇത് ലവ് മാര്യേജ് ആണോ അറേഞ്ച്ഡ് മാര്യേജ് ആണോ തുടങ്ങിയ കാര്യങ്ങളൊക്കെ വരും ദിവസങ്ങളില്‍ വെളിപ്പെടുത്താമെന്നും അനുമോള്‍ വ്യക്തമാക്കി.

‘പലരും ചോദിക്കുന്നുണ്ട്, എന്താണ് വിവാഹം നേരത്തെ പറയാതിരുന്നത് എന്ന്. വിവാഹം എന്നൊക്കെ പറഞ്ഞാല്‍ ഏറെ സന്തോഷമുള്ള കാര്യമല്ലേ? അത് കൊട്ടിഘോഷിച്ച് നടക്കണോ എന്നു തോന്നി… അറിയില്ല, എന്നെ ഇഷ്ടമില്ലാത്ത? ആളുകളുണ്ടാവുമല്ലോ… ഉള്ള സന്തോഷം അങ്ങനെ തന്നെ നില്‍ക്കട്ടെ, അതില്ലാതെയാക്കേണ്ട എന്നോര്‍ത്തു. അതാണ് അവസാനം റിവീല്‍ ചെയ്യാം എന്നോര്‍ത്തത്. നേരത്തെ പറയാത്തതില്‍ ഒന്നും വിചാരിക്കരുത്,’ അനുമോള്‍ കൂട്ടിച്ചേര്‍ത്തു.