30 വയസായിട്ടും ആരെയും കണ്ടെത്താത്തതില്‍ മാതാപിതാക്കള്‍ക്ക് ആശങ്ക ഉണ്ടായിരുന്നു; വിദ്യാ ബാലന്‍

ഇന്ത്യന്‍ സിനിമയില്‍ ഏറെ ചര്‍ച്ച ചെയ്യപ്പെട്ട നടിയാണ് വിദ്യ ബാലന്‍. ഒരേസമയം ഗ്ലാമറസ് റോളുകളിലൂടെയും കരുത്തുള്ള കഥാപാത്രങ്ങളിലൂടെയും വിദ്യ ആരാധകരെ ഞെട്ടിച്ചിട്ടുണ്ട്. മലയാളത്തില്‍ അരങ്ങേറ്റം കുറിക്കേണ്ട നടിയായിരുന്നു വിദ്യ ബാലന്‍. എന്നാല്‍, രാശിയില്ലാത്ത നടിയാണെന്ന് പറഞ്ഞ് മലയാള സിനിമ വിദ്യയെ തട്ടി കളയുകയാണ് ചെയ്തത്.

മോഹന്‍ലാല്‍ ചിത്രത്തിലൂടെയാണ് വിദ്യ അരങ്ങേണ്ടിയിരുന്നത്. ലോഹിതദാസ് ചിത്രം ചക്രം ആയിരുന്നു ആ സിനിമ. മോഹന്‍ലാലും ദിലീപും വിദ്യ ബാലനും കേന്ദ്ര കഥാപാത്രങ്ങളാകുന്ന രീതിയിലാണ് ലോഹിതദാസ് ആദ്യം ചക്രം തുടങ്ങിയത്. എന്നാല്‍, ആദ്യ ഷെഡ്യൂളിന് ശേഷം സിനിമ നിലച്ചു. അരങ്ങേറ്റ ചിത്രം തന്നെ പൂര്‍ത്തിയാക്കാന്‍ കഴിയാത്ത നടിയെന്ന് വിദ്യയെ മലയാള സിനിമാ ലോകം പരിഹസിച്ചു.

ഇപ്പോള്‍ മാതാപിതാക്കളെക്കുറിച്ചാണ് വിദ്യ സംസാരിക്കുന്നത്. 33 വയസ് വരെ മാതാപിതാക്കള്‍ക്കൊപ്പമാണ് ഞാന്‍ താമസിച്ചത്. ഞാനാരെയെങ്കിലും ഡേറ്റ് ചെയ്യുകയോ ഇഷ്ടപ്പെടുകയോ ചെയ്യുന്നുണ്ടെങ്കില്‍ അവര്‍ക്കറിയാം. 30 വയസായിട്ടും നീ ആരെയും കണ്ടെത്തിയില്ലേ എന്ന് മാതാപിതാക്കള്‍ ആശങ്കപ്പെട്ടു എന്നാണ് താരം പറയുന്നത്.