വയറുവേദന കുറഞ്ഞു; രജനികാന്തിന്റെ ആരോഗ്യനില ഇപ്പോള്‍ ഇങ്ങനെ

ഇന്നലെ വൈകിട്ട് ആശുപത്രിയില്‍ പ്രവേശിപ്പിച്ച നടന്‍ രജനികാന്തിന്റെ ആരോഗ്യനില തൃപ്തികരം. കടുത്ത വയറുവേദനയെ തുടര്‍ന്നാണ് താരത്തെ ചെന്നൈ അപ്പോളോ ആശുപത്രിയില്‍ പ്രവേശിപ്പിച്ചത്. വയറുവേദന കുറഞ്ഞെന്നും ഉടന്‍ ആശുപത്രി വിടാന്‍ സാധിക്കുമെന്നാണ് പ്രതീക്ഷയെന്ന് അദ്ദേഹവുമായി അടുത്ത വൃത്തങ്ങള്‍ റിപ്പോര്‍ട്ട് ചെയ്യുന്നു.

സിനിമ ചിത്രീകരണത്തിനിടെ ദേഹാസ്വാസ്ഥ്യം അനുഭവപ്പെട്ടതിനെത്തുടര്‍ന്നാണ് താരത്തെ ആശുപത്രിയില്‍ പ്രവേശിപ്പിച്ചത്. ഹൃദയസംബന്ധമായ പരിശോധനകള്‍ക്ക് കൂടി വിധേയനായ ശേഷം രജനികാന്ത് ആശുപത്രി വിട്ടേക്കും. എന്നാല്‍ ഇത് സംബന്ധിച്ച് രജനികാന്തിന്റെ കുടുംബത്തില്‍ നിന്നോ ആശുപത്രിയില്‍ നിന്നോ ഔദ്യോഗിക അറിയിപ്പുകളൊന്നും ഇതുവരെ ഉണ്ടായിട്ടില്ല.

നേരത്തെ നിശ്ചയിച്ചിരുന്ന എലക്ടീവ് പ്രൊസീജിയറിന് അദ്ദേഹത്തെ വിധേയനാക്കുമെന്ന് വൃത്തങ്ങള്‍ സ്ഥിരീകരിച്ചു. കാര്‍ഡിയോളജിസ്റ്റ് ഡോ.സായ് സതീഷിന്റെ മേല്‍നോട്ടത്തില്‍ ആണ് എലക്ടീവ് പ്രൊസീജിയര്‍ നടക്കുക. ഡോക്ടര്‍മാരുടെ ഒരു സംഘം താരത്തെ നിരീക്ഷിച്ചു വരികയാണെന്ന് ഡെക്കാന്‍ ഹെറാള്‍ഡ് റിപ്പോര്‍ട്ട് ചെയ്യുന്നു.