മള്‍ട്ടി സ്റ്റാര്‍ ചിത്രം സംവിധാനം ചെയ്യാന്‍ പൃഥ്വി; മമ്മൂട്ടിക്കൊപ്പം ആരൊക്കെയെന്നോ?

മലയാള സിനിമയിലെ ഏറ്റവും സക്സസ്ഫുള്‍ ആയ കൊമേഴ്സ്യല്‍ ഡയറക്ടര്‍മാരില്‍ ഒരാളായിരുന്നു സച്ചി. 2020 ജൂണ്‍ 20 നാണ് സച്ചി മരണത്തിനു കീഴടങ്ങിയത്. ഒട്ടേറെ സ്വപ്നങ്ങള്‍ ബാക്കിവെച്ചായിരുന്നു സച്ചിയുടെ പോക്ക്. ഇപ്പോള്‍ ഇതാ സച്ചിയുടെ ഏറ്റവും വലിയ സ്വപ്നമായിരുന്ന ബ്രഹ്‌മാണ്ഡ ചിത്രം സംവിധാനം ചെയ്യാന്‍ പൃഥ്വിരാജ് ശ്രമിക്കുന്നതായി റിപ്പോര്‍ട്ട്.

മമ്മൂട്ടിയെ കേന്ദ്ര കഥാപാത്രമാക്കി സച്ചി പ്ലാന്‍ ചെയ്ത ബ്രിഗന്റ് എന്ന സിനിമയാണ് അത്. പൃഥ്വിരാജ്, ആസിഫ് അലി, ബിജു മേനോന്‍, ടൊവിനോ തോമസ് എന്നിവരും മമ്മൂട്ടിക്കൊപ്പം ഉണ്ടാകുമെന്ന് പ്രൊഡക്ഷന്‍ കണ്‍ട്രോളര്‍ ബാദുഷയോട് സച്ചി മരണത്തിനു മുന്‍പ് വെളിപ്പെടുത്തിയിരുന്നു. സച്ചിയുടെ സ്വപ്ന പ്രൊജക്ട് നിറവേറ്റാന്‍ സംവിധായകന്‍ കൂടിയായ പൃഥ്വിരാജ് ശ്രമങ്ങള്‍ ആരംഭിച്ചെന്നാണ് പുറത്തുവരുന്ന റിപ്പോര്‍ട്ടുകള്‍.

ബ്രിഗന്റ് സിനിമയുടെ കഥ സച്ചിയുമായി അടുത്ത വൃത്തങ്ങള്‍ പൃഥ്വിരാജിനെ അറിയിച്ചിട്ടുണ്ടെന്നും ഈ പ്രൊജക്ട് യഥാര്‍ഥ്യമാകുന്നതിനു വേണ്ടി പൃഥ്വി മമ്മൂട്ടിയെ സമീപിച്ചേക്കുമെന്നുമാണ് വിവരം. ഇക്കാര്യത്തില്‍ ഔദ്യോഗിക സ്ഥിരീകരണങ്ങളൊന്നും ഇതുവരെ ലഭിച്ചിട്ടില്ല.