ലാലേട്ടന്‍ വരുമ്പോള്‍ ചന്ദനത്തിന്റെ മണമാണ്: അന്ന രാജന്‍

അങ്കമാലി ഡയറീസിലെ ലിച്ചി എന്ന കഥാപാത്രത്തിലൂടെ മലയാളികള്‍ക്ക് പ്രിയങ്കരിയായ നടിയാണ് അന്ന രാജന്‍. ലാല്‍ ജോസ് സംവിധാനം ചെയ്ത വെളിപാടിന്റെ പുസ്‌കമായിരുന്നു അന്നയുടെ രണ്ടാമത്തെ ചിത്രം. ഇടുക്കി ബ്ലാസ്റ്റേഴ്‌സ് ആണ് അന്നയുടേതായി ഇനി പുറത്തിറങ്ങാനുള്ള ചിത്രം. ഇപ്പോള്‍ ഈ സിനിമയുടെ പോസ്റ്റ് പ്രൊഡക്ഷന്‍ വര്‍ക്കുകള്‍ നടന്നുവരികയാണ്.

മോഡലിങിലും സജീവമായ ലിച്ചി മോഹന്‍ലാലിനും മമ്മൂട്ടിക്കും ഒപ്പം അഭിനയിച്ചപ്പോഴുള്ള അനുഭവം പങ്കിട്ടിരിക്കുകയാണ്. താരം സൂപ്പര്‍ താരങ്ങളെ കുറിച്ച് പറയുന്ന വീഡിയോ വൈറലാണ്. ‘മമ്മൂക്ക നമ്മളെ ഒരുപാട് ബഹുമാനിക്കുന്ന ആളാണ്. നമ്മള്‍ ഒന്നും ആരും അല്ല അദ്ദേഹത്തിന് മുമ്പില്‍. എന്നാലും അദ്ദേഹം അങ്ങനെയാണ്. ഒരിക്കല്‍ സെറ്റില്‍ അദ്ദേഹം ഇരിക്കുകയാണ്. ഞാന്‍ അങ്ങോട്ടേക്ക് കയറി ചെന്നപ്പോള്‍ തന്നെ അദ്ദേഹം എഴുന്നേറ്റു എന്നും അന്ന പറയുന്നു.

ലാലേട്ടന്‍ വരുമ്പോള്‍ ചന്ദനത്തിന്റെ മണമാണ്. ഏതോ ഒരു ഗന്ധര്‍വന്‍ വരുന്ന ഒരു ഫീലായിരുന്നു അദ്ദേഹം കയറി വന്നപ്പോള്‍.’ ‘നമ്മള്‍ക്ക് വൈകുന്നേരമായിരുന്നു ഷൂട്ട്. നല്ല ടയേര്‍ഡും. പക്ഷെ അദ്ദേഹം കയറി വരുമ്പോള്‍ ഒരു ഭയങ്കര എനര്‍ജിയാണ് നമ്മള്‍ക്ക് കിട്ടുക എന്നും അന്ന പറയുന്നു.