ഭ്രമയുഗത്തിനു എട്ടിന്റെ പണി; മമ്മൂട്ടി കഥാപാത്രത്തിന്റെ പേര് മാറ്റി

റിലീസിനു ഏതാനും മണിക്കൂറുകള്‍ക്ക് മുന്‍പ് ഭ്രമയുഗത്തിലെ മമ്മൂട്ടി കഥാപാത്രത്തിന്റെ പേര് മാറ്റി. കുഞ്ചമന്‍ പോറ്റി എന്ന മമ്മൂട്ടി കഥാപാത്രത്തിന്റെ പേര് കൊടുമണ്‍ പോറ്റി എന്നാക്കി. കോടതി നടപടിയെ തുടര്‍ന്നാണ് അണിയറ പ്രവര്‍ത്തകര്‍ പേര് മാറ്റാന്‍ നിര്‍ബന്ധിതരായത്.

കഥാപാത്രത്തിന്റെ പേരു മാറ്റണമെന്ന നിര്‍മാതാക്കളുടെ ആവശ്യം അംഗീകരിച്ച് ഇതിനുള്ള നിര്‍ദേശം നല്‍കിയെന്ന് സെന്‍സര്‍ ബോര്‍ഡ് കോടതിയെ അറിയിച്ചു. നാളെയാണ് വേള്‍ഡ് വൈഡായി അഞ്ച് ഭാഷകളില്‍ ചിത്രം റിലീസ് ചെയ്യുന്നത്.

ഭ്രമയുഗത്തിന്റെ സെന്‍സര്‍ സര്‍ട്ടിഫിക്കറ്റ് പിന്‍വലിക്കണമെന്ന് ആവശ്യപ്പെട്ട് കോട്ടയം ജില്ലയിലെ പുഞ്ചമണ്‍ ഇല്ലക്കാര്‍ ആണ് ഹൈക്കോടതിയെ സമീപിച്ചത്. ചിത്രത്തില്‍ മമ്മൂട്ടി അവതരിപ്പിക്കുന്ന ‘കുഞ്ചമണ്‍ പോറ്റി’ അല്ലെങ്കില്‍ ‘പുഞ്ചമണ്‍ പോറ്റി’ എന്നത് തങ്ങളുടെ കുടുംബപ്പേരും സ്ഥാനപ്പേരുമാണെന്നും അവര്‍ വാദിച്ചു. കഥാപാത്രം ദുര്‍മന്ത്രവാദങ്ങളും മറ്റും ചെയ്യുന്നതായി കാണിച്ചിരിക്കുന്നത് തങ്ങളുടെ കുടുംബത്തിന്റെ സത്കീര്‍ത്തിയെ ബാധിക്കുന്നതാണെന്നുമാണ് ഹര്‍ജിയില്‍ പറഞ്ഞിരിക്കുന്നത്.