എന്റെ ശരീരത്തെ തന്നെ ഞാന്‍ വെറുത്തിരുന്നു; മനസ് തുറന്ന് വിദ്യ ബാലന്‍

ഇന്ത്യന്‍ സിനിമയില്‍ ഏറെ ചര്‍ച്ച ചെയ്യപ്പെട്ട നടിയാണ് വിദ്യ ബാലന്‍. ഒരേസമയം ഗ്ലാമറസ് റോളുകളിലൂടെയും കരുത്തുള്ള കഥാപാത്രങ്ങളിലൂടെയും വിദ്യ ആരാധകരെ ഞെട്ടിച്ചിട്ടുണ്ട്. മലയാളത്തില്‍ അരങ്ങേറ്റം കുറിക്കേണ്ട നടിയായിരുന്നു വിദ്യ ബാലന്‍. എന്നാല്‍, രാശിയില്ലാത്ത നടിയാണെന്ന് പറഞ്ഞ് മലയാള സിനിമ വിദ്യയെ തട്ടി കളയുകയാണ് ചെയ്തത്.

മോഹന്‍ലാല്‍ ചിത്രത്തിലൂടെയാണ് വിദ്യ അരങ്ങേണ്ടിയിരുന്നത്. ലോഹിതദാസ് ചിത്രം ചക്രം ആയിരുന്നു ആ സിനിമ. മോഹന്‍ലാലും ദിലീപും വിദ്യ ബാലനും കേന്ദ്ര കഥാപാത്രങ്ങളാകുന്ന രീതിയിലാണ് ലോഹിതദാസ് ആദ്യം ചക്രം തുടങ്ങിയത്. എന്നാല്‍, ആദ്യ ഷെഡ്യൂളിന് ശേഷം സിനിമ നിലച്ചു. അരങ്ങേറ്റ ചിത്രം തന്നെ പൂര്‍ത്തിയാക്കാന്‍ കഴിയാത്ത നടിയെന്ന് വിദ്യയെ മലയാള സിനിമാ ലോകം പരിഹസിച്ചു.

ഇപ്പോള്‍ തന്റെ ശരീരത്തെക്കുറിച്ച് കേള്‍ക്കേണ്ടി വന്നിട്ടുള്ള മോശം കമന്റുകളെക്കുറിച്ച് സംസാരിക്കുകയാണ് വിദ്യ. മറ്റുള്ളവരുടെ അഭിപ്രായങ്ങള്‍ കേട്ട് തന്നെതന്നെ സ്വയം വെറുത്ത സമയം ഉണ്ടായിരുന്നു. ഞാന്‍ എന്റെ ശരീരത്തിലേക്ക് വെറുപ്പ് മാത്രമേ അയയ്ക്കുന്നുള്ളൂവെന്ന് ഞാന്‍ മനസ്സിലാക്കി. ‘ഞാന്‍ ആഗ്രഹിക്കുന്നതുപോലെയല്ല നീ’ എന്ന് ഞാന്‍ നിരന്തരം പറഞ്ഞുകൊണ്ടിരുന്നു. അതിനാല്‍, ഞാന്‍ നിരന്തരം രോഗബാധിതയായി. എന്നാല്‍ പിന്നീട് താന്‍ അത് മറികടന്നു എന്നും താരം പറയുന്നു.