ആ സിനിമ ചെയ്തത് പ്രതിഫലം വാങ്ങാതെ: ടൊവിനോ തോമസ്

ഡോ.ബിജു സംവിധാനം ചെയ്ത അദൃശ്യജാലകങ്ങള്‍ ആണ് ടൊവിനോ തോമസിന്റേതായി ഉടന്‍ റിലീസ് ചെയ്യാനിരിക്കുന്ന ചിത്രം. വേറിട്ട ഗെറ്റപ്പില്ലാണ് ടൊവിനോ ഈ ചിത്രത്തില്‍ അഭിനയിക്കുന്നത്. ഈ ചിത്രത്തിന്റെ സഹനിര്‍മാതാവ് കൂടിയാണ് ടൊവിനോ.

പണത്തേക്കാള്‍ വലിയ ആത്മസംതൃപ്തിയാണ് അദൃശ്യജാലകങ്ങള്‍ പോലെയുള്ള സിനിമകള്‍ തനിക്ക് നല്‍കുന്നതെന്ന് ടൊവിനോ പറഞ്ഞു. സിനിമയ്ക്കായി താന്‍ പ്രതിഫലം വാങ്ങിയിട്ടില്ലെന്നും ടൊവിനോ പറയുന്നു.

‘ ഞാന്‍ സഹനിര്‍മാതാവായി എത്തുമ്പോള്‍ അതിനനുസരിച്ച് പ്രതിഫലത്തിലും വിട്ടുവീഴ്ച ചെയ്യേണ്ടിവരും. കള, വഴക്ക് തുടങ്ങിയ സിനിമകളിലും അങ്ങനെ ചെയ്തിരുന്നു. ലാഭത്തെ കുറിച്ചുള്ള ചിന്തകള്‍ ഇല്ലാതെയും വിട്ടുവീഴ്ചകള്‍ ഇല്ലാതെയും ഇത്തരം നല്ല സിനിമകള്‍ സാധ്യമാകാന്‍ ഞാന്‍ ആഗ്രഹിക്കുന്നു,’ ടൊവിനോ പറഞ്ഞു.