സ്വത്തെല്ലാം ഭര്‍ത്താവ് ധൂര്‍ത്തടിച്ചു; സിനിമയം വെല്ലുന്ന കനകലതയുടെ ജീവിതകഥ

മലയാളികള്‍ക്ക് ഏറെ സുപരിചിതയായ അഭിനേത്രിയാണ് കനകലത. ദാരിദ്ര്യത്തില്‍ നിന്ന് അഭിനയലോകത്തേക്ക് എത്തി സീരിയലുകളിലും സിനിമകളിലും തിളങ്ങിയ കനകലത ഇപ്പോഴും അഭിനയരംഗത്ത് സജീവമാണ്.
കനകലതയുടെ ജീവിതം ഒരു സിനിമ കഥ പോലെ നാടകീയമാണ്.

സ്‌കൂള്‍ കാലഘട്ടം മുതല്‍ തന്നെ കനകലത നാടകരംഗത്ത് സജീവമായിരുന്നു. 50 രൂപയായിരുന്നു ആദ്യകാല പ്രതിഫലം. സിനിമയില്‍ ലഭിക്കുന്ന കഥാപാത്രങ്ങളെല്ലാം കനകലത ഒരു മടിയും കൂടാതെ ചെയ്തു. ഷക്കീല ചിത്രങ്ങളിലും അക്കാലത്ത് അഭിനയിച്ചു.

നടി കവിയൂര്‍ പൊന്നമ്മയുടെ കുടുംബമാണ് കനകലതയെ സിനിമയിലേക്ക് കൊണ്ടുവന്നത്. അവിടെ നിന്ന് സിനിമയിലേക്ക് എത്തി. സിനിമയില്‍ സജീവമായി നില്‍ക്കെ 22-ാം വയസ്സിലാണ് കനകലത വിവാഹം കഴിച്ചത്.
സമ്പാദ്യമെല്ലാം ഭര്‍ത്താവ് ധൂര്‍ത്തടിക്കുകയും ഇത് താരത്തെ മാനസികമായി തളര്‍ത്തുകയും ചെയ്തു. 16 വര്‍ഷത്തിനു ശേഷം വിവാഹമോചനം നേടിയ കനകലത അതിനു ശേഷവും സിനിമയില്‍ സജീവമായിരുന്നു.

ഇനി ഒരു വിവാഹമില്ലെന്നും ദാമ്പത്യ ജീവിതം മടുത്തുവെന്നും തന്നെ ഭര്‍ത്താവ് ചൂഷണം ചെയ്യുകയായിരുന്നുവെന്നും പഴയൊരു അഭിമുഖത്തില്‍ കനകലത തുറന്നുപറഞ്ഞിട്ടുണ്ട്. വിവാഹമോചനത്തിനു ശേഷം സഹോദരിക്കൊപ്പമാണ് താരം താമസിക്കുന്നത്.