നടന്‍ ഇന്നസെന്റ് ആശുപത്രിയില്‍; പ്രാര്‍ത്ഥനയോടെ ആരാധകര്‍

നടനും മുന്‍ എംപിയുമായ ഇന്നസെന്റ് ആശുപത്രിയില്‍. അര്‍ബുദത്തെ തുടര്‍ന്നുള്ള ശാരീരിക അസ്വസ്ഥതകള്‍ മൂലമാണ് അദ്ദേഹത്തെ കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചത്. കഴിഞ്ഞ ഒരാഴ്ചയായി ഇന്നസെന്റ് ആശുപത്രിയില്‍ ചികിത്സയില്‍ കഴിഞ്ഞുവരികയാണെന്നാണ് റിപ്പോര്‍ട്ട്.

കഴിഞ്ഞ ദിവസം വൈകിട്ടോടെ അദ്ദേഹത്തിന്റെ ആരോഗ്യനില ഗുരുതരമായെന്നും റിപ്പോര്‍ട്ടിലുണ്ട്. അതേസമയം അദ്ദേഹം ഇപ്പോള്‍ മരുന്നുകളോട് പ്രതികരിക്കുന്നുണ്ടെന്നാണ് ആശുപത്രി വൃത്തങ്ങള്‍ റിപ്പോര്‍ട്ട് ചെയ്യുന്നത്. ഇപ്പോള്‍ ആരോഗ്യനിലയില്‍ നേരിയ പുരോഗതിയുണ്ടെന്നാണ് വിവരം.

നേരത്തെ അര്‍ബുദത്തെ ഇച്ഛാശക്തികൊണ്ട് പോരാടി തോല്‍പ്പിച്ച താരമാണ് ഇന്നസെന്റ്. അര്‍ബുദത്തില്‍ നിന്ന് മുക്തനായ ശേഷം ഇന്നസെന്റ് പൊതുരംഗത്ത് സജീവ സാന്നിധ്യമായിരുന്നു.