വേദനാജനകം, വിശ്രമം വേണം; അമിതാഭ് ബച്ചന് പരുക്ക്

സിനിമാ ചിത്രീകരണത്തിനിടെ നടന്‍ അമിതാഭ് ബച്ചന് പരുക്കേറ്റു. പ്രഭാസ് നായകനായി എത്തുന്ന ‘പ്രൊജക്ട് കെ’ എന്ന സിനിമയുടെ ചിത്രീകരണത്തിനിടെയാണ് ബിഗ് ബിയ്ക്ക് പരുക്കേറ്റത്. താരം തന്നെയാണ് ഇക്കാര്യം ബ്ലോഗിലൂടെ അറിയിച്ചത്. ഹൈദരബാദില്‍ വെച്ചായിരുന്നു ചിത്രീകരണം.

പരുക്കേറ്റ അമിതാഭ് ബച്ചന്‍ ഇപ്പോള്‍ മുംബൈയിലെ വസതിയില്‍ വിശ്രമത്തിലാണ്. വാരിയെല്ലിന് ക്ഷതമേറ്റ താരത്തെ ഹൈദരബാദിലെ എഐജി ആശുപത്രിയിലാണ് ആദ്യം പ്രവേശിപ്പിച്ചത്. ഡോക്ടറുടെ നിര്‍ദേശപ്രകാരം സിടി സ്‌കാന്‍ എടുത്ത ശേഷം വീട്ടിലേക്ക് തിരിച്ചയക്കുകയായിരുന്നു. രണ്ടാഴ്ചത്തെ വിശ്രമം വേണമെന്ന് ഡോക്ടര്‍ നിര്‍ദേശിച്ചിട്ടുണ്ട്. സംഭവത്തിനു പിന്നാലെ സിനിമയുടെ ചിത്രീകരണം നിര്‍ത്തിവെച്ചു.

പരുക്ക് വേദനാജനകമാണെന്നും ഇപ്പോള്‍ ആരാധകരെ കാണാന്‍ പ്രയാസമാണെന്നും ആരും മുംബൈയിലെ വസതിക്ക് പുറത്ത് എത്തരുതെന്നും താരം അഭ്യര്‍ത്ഥിച്ചു.