ഉണ്ണി മുകുന്ദനും ബാലയും തമ്മിലുള്ള പ്രശ്‌നം എന്ത്?

സിനിമ മേഖലയില്‍ വലിയ ചര്‍ച്ചയായിരിക്കുകയാണ് നടന്‍മാരായ ബാലയും ഉണ്ണി മുകുന്ദനും തമ്മിലുള്ള പ്രശ്‌നം. ഉണ്ണി മുകുന്ദനെതിരെ രൂക്ഷ ഭാഷയിലാണ് ബാല കഴിഞ്ഞ ദിവസം പ്രതികരിച്ചത്. ഉണ്ണി മുകുന്ദന്‍ നിര്‍മിച്ച ഷെഫീക്കിന്റെ സന്തോഷം എന്ന സിനിമയില്‍ അഭിനയിച്ചതിനു അതിനു പിന്നില്‍ പ്രവര്‍ത്തിച്ച അണിയറപ്രവര്‍ത്തകര്‍ക്ക് പോലും പ്രതിഫലം നല്‍കിയിട്ടില്ലെന്ന ഗുരുതര ആരോപണമാണ് ബാല ഒരു അഭിമുഖത്തില്‍ ഉന്നയിച്ചത്.

തനിക്ക് പ്രതിഫലം ലഭിച്ചില്ലെങ്കിലും കുഴപ്പമില്ല. അതിനു പിന്നില്‍ പ്രവര്‍ത്തിച്ച ബാക്കി ആളുകള്‍ക്കെങ്കിലും പണം നല്‍കണമെന്നും ബാല ആവശ്യപ്പെട്ടു. ചിത്രത്തില്‍ അഭിനയിച്ച സ്ത്രീകള്‍ക്ക് മാത്രമാണ് പണം നല്‍കിയതെന്നും അതിന്റെ ഉദ്ദേശം വേറെയാണെന്നും ബാല പരിഹസിച്ചു.

സംവിധായകന്‍ അടക്കമുള്ളവര്‍ക്ക് പണം നല്‍കിയിട്ടില്ല. എല്ലാവര്‍ക്കും ആവശ്യങ്ങളുണ്ട്. പരാതി കൊടുക്കുന്നില്ല. ഉണ്ണി മുകുന്ദന്‍ നന്നാവണമെന്ന് മാത്രമാണ് ആഗ്രഹമെന്നും ബാല പറഞ്ഞു.

അതേസമയം, ബാലയുടെ ആരോപണം ഉണ്ണി മുകുന്ദന്‍ നിഷേധിക്കുകയാണ്. ബാലയ്ക്ക് അടക്കം പ്രതിഫലം നല്‍കിയിട്ടുണ്ടെന്നാണ് ഉണ്ണി മുകുന്ദനുമായി അടുത്ത വൃത്തങ്ങള്‍ വിശദീകരിക്കുന്നത്.