ബിജു മേനോനും കുഞ്ചാക്കോ ബോബനും ഒന്നിക്കുന്നു; ഓര്‍ഡിനറിക്ക് രണ്ടാം ഭാഗമോ?

മലയാളത്തിലെ ഹിറ്റ് കൂട്ടുകെട്ടാണ് കുഞ്ചാക്കോ ബോബന്‍-ബിജു മേനോന്‍. ഇരുവരും ഒന്നിച്ച് സിനിമകളെല്ലാം സൂപ്പര്‍ഹിറ്റുകളായിരുന്നു. ബിജു മേനോനും കുഞ്ചാക്കോ ബോബനും വീണ്ടും ഒന്നിക്കുകയാണെന്ന വാര്‍ത്തകളാണ് ഇപ്പോള്‍ പുറത്തുവരുന്നത്.

സുഗീത് സംവിധാനം ചെയ്ത് 2012 ല്‍ പുറത്തിറങ്ങിയ ചിത്രമാണ് ഓര്‍ഡിനറി. കുഞ്ചാക്കോ ബോബനും ബിജു മേനോനുമാണ് ഈ ചിത്രത്തില്‍ കേന്ദ്ര കഥാപാത്രങ്ങളെ അവതരിപ്പിച്ചത്. ഓര്‍ഡിനറിയുടെ രണ്ടാം ഭാഗമാണ് ഉടന്‍ വരുന്നതെന്ന് റിപ്പോര്‍ട്ടുകളുണ്ട്. ഈ ചിത്രത്തിനു വേണ്ടിയാണ് കുഞ്ചാക്കോ ബോബനും ബിജു മേനോനും ഒന്നിക്കുന്നത്.

കുഞ്ചാക്കോ ബോബന്‍-ബിജുമേനോന്‍ കൂട്ടുകെട്ടില്‍ വരുന്ന പന്ത്രണ്ടാമത്തെ ചിത്രം കൂടിയാകും ഇത്. രണ്ടാം ഭാഗം ഗവിയില്‍ നിന്ന് മാറി മറ്റൊരു പശ്ചാത്തലത്തില്‍ ആകും ചിത്രീകരിക്കുക. സുഗീത് സംവിധാനം ചെയ്ത ഓര്‍ഡിനറി പത്തനംതിട്ട ജില്ലയിലെ ഗവി, ഇടുക്കി ജില്ലയിലെ വാഗമണ്‍ എന്നിവിടങ്ങളിലാണ് ചിത്രീകരിച്ചത്.