നിനക്ക് നിറം കുറവല്ലേ, എന്നിട്ടും ഇത്ര വലിയ രീതിയില്‍ എത്തിയല്ലോ; ഒരു പ്രമുഖ നടി തന്നോട് ചോദിച്ചത് വെളിപ്പെടുത്തി നവ്യ നായര്‍

നിറത്തിന്റെ പേരില്‍ താന്‍ സിനിമ ഇന്‍ഡസ്ട്രിക്കുള്ളില്‍ തന്നെ ബോഡി ഷെയ്മിങ് അനുഭവിച്ചിട്ടുണ്ടെന്ന് വെളിപ്പെടുത്തി നവ്യ നായര്‍. ഒരു മാധ്യമത്തിനു നല്‍കിയ അഭിമുഖത്തില്‍ സംസാരിക്കുകയായിരുന്നു നവ്യ. സിനിമയില്‍ വന്ന സമയത്ത് തന്റെ നിറത്തെ കുറിച്ചും സൗന്ദര്യത്തെ കുറിച്ചും തനിക്ക് അപകര്‍ഷതാബോധം ഉണ്ടായിരുന്നെന്നും നവ്യ പറഞ്ഞു.

ഒരിക്കല്‍ വളരെ അറിയപ്പെടുന്ന ഒരു നടി വന്ന് ചോദിച്ചു. നിനക്ക് നിറം കുറവാണല്ലോ, സൗന്ദര്യവും കുറവ്. എന്നിട്ടും എങ്ങനെയാണ് ഇത്രയും സിനിമകള്‍ കിട്ടുന്നതെന്ന്. ഈ ചോദ്യം വര്‍ഷങ്ങള്‍ക്ക് ശേഷവും തന്റെ മനസ്സില്‍ കിടക്കുന്നുണ്ടെന്നും നവ്യ പറഞ്ഞു.

സിബി മലയില്‍ സംവിധാനം ചെയ്ത ഇഷ്ടം എന്ന സിനിമയിലൂടെയാണ് നവ്യ അഭിനയ രംഗത്തേക്ക് എത്തിയത്. പിന്നീട് ഒരുപിടി നല്ല സിനിമകളുടെ ഭാഗമായി. വിവാഹശേഷം സിനിമയില്‍ നിന്ന് ബ്രേക്ക് എടുത്തെങ്കിലും ഒരുത്തി എന്ന ചിത്രത്തിലൂടെ ഗംഭീര തിരിച്ചുവരവാണ് താരം ഇപ്പോള്‍ നടത്തിയിരിക്കുന്നത്.