മമ്മൂട്ടിയുടെ തല പൊട്ടി ചോരയൊലിക്കുന്നു, ഞാന്‍ നോക്കുമ്പോള്‍ അദ്ദേഹം പൊട്ടിക്കരയുകയായിരുന്നു; മുകേഷ്

മമ്മൂട്ടിയുമായി ഏറെ അടുത്ത സൗഹൃദം കാത്തുസൂക്ഷിക്കുന്ന താരമാണ് മുകേഷ്. ഇരുവരും ഒന്നിച്ച് അഭിനയിച്ച സിനിമകളില്‍ പലതും സൂപ്പര്‍ഹിറ്റുകളായിരുന്നു. കരിയറിന്റെ തുടക്കകാലത്ത് മമ്മൂട്ടിക്കൊപ്പം തന്നെയാണ് മുകേഷ് കൂടുതല്‍ സിനിമകളിലും അഭിനയിച്ചത്.

വര്‍ഷങ്ങള്‍ക്ക് മുന്‍പ് ഒരു സിനിമയുടെ ഷൂട്ടിങ്ങിനിടെ മമ്മൂട്ടി പൊട്ടിക്കരയുന്നത് താന്‍ കണ്ടിട്ടുണ്ടെന്ന് പറയുകയാണ് മുകേഷ്. 1982 ല്‍ പുറത്തിറങ്ങിയ ബലൂണ്‍ എന്ന സിനിമയുടെ സെറ്റില്‍വെച്ച് സംഭവിച്ച കാര്യമാണ് മുകേഷ് വെളിപ്പെടുത്തിയത്.

‘ഞാനും മമ്മൂട്ടിയും നായകരായി അഭിനയിച്ച ‘ബലൂണ്‍’ സിനിമയുടെ ഷൂട്ടിങ് ചെങ്കോട്ടയിലായിരുന്നു. ഷൂട്ടിങ്ങിന്റെ ഇടവേളയില്‍ എന്നെ ബൈക്കിലിരുത്തി ഈ റോഡിലൂടെ മമ്മൂട്ടി യാത്രചെയ്തു. ടാറൊന്നുമില്ലാത്ത ചളി നിറഞ്ഞ റോഡായിരുന്നു. ഒരു വളവ് തിരിഞ്ഞപ്പോള്‍ ബൈക്ക് മറിഞ്ഞു. ചാടിയിറങ്ങിയ ഞാന്‍ കണ്ടത് തലപൊട്ടി ചോരയൊലിക്കുന്ന മമ്മൂട്ടിയെയായിരുന്നു. സാധാരണ ശക്തനായ മമ്മൂട്ടി പക്ഷേ പൊട്ടിക്കരയുന്നതാണ് കണ്ടത്. മുഖത്ത് മുറിവേറ്റ തന്നെ ഇനി ആര് അഭിനയിക്കാന്‍ വിളിക്കുമെന്ന് ചോദിച്ചാണ് മമ്മൂട്ടി കരഞ്ഞത്,’ മുകേഷ് പറഞ്ഞു.