ബിലാലില്‍ ഫഹദ് ഫാസില്‍ ഉണ്ടോ? മറുപടിയുമായി മമ്മൂട്ടി

അമല്‍ നീരദ്-മമ്മൂട്ടി ചിത്രം ഭീഷ്മ പര്‍വ്വം മാര്‍ച്ച് മൂന്നിന് റിലീസ് ചെയ്യും. വലിയ ആവേശത്തിലാണ് ആരാധകര്‍. ബിഗ് ബിയുടെ രണ്ടാം ഭാഗമായ ബിലാല്‍ ചെയ്യാന്‍ ഉദ്ദേശിച്ച സമയത്താണ് ഭീഷ്മ പര്‍വ്വം എന്ന പ്രൊജക്ട് ചെയ്യാന്‍ ഇരുവരും തീരുമാനിച്ചത്. ചെറിയൊരു ബ്രേക്കിന് ശേഷം ബിലാല്‍ ചെയ്യാനാണ് അമല്‍ നീരദും മമ്മൂട്ടിയും തീരുമാനിച്ചിരിക്കുന്നത്.

ബിലാല്‍ ഉറപ്പായും വരുമെന്ന് മമ്മൂട്ടി പറയുന്നു. അതിന്റെ ചര്‍ച്ചകളും തീരുമാനങ്ങളും ഉടന്‍ ആരാധകര്‍ അറിയുമെന്നാണ് മെഗാസ്റ്റാറിന്റെ വാക്കുകളില്‍ നിന്ന് വ്യക്തമാകുന്നത്.

ബിലാലില്‍ മമ്മൂട്ടിക്കൊപ്പം ഫഹദ് ഫാസിലും ഉണ്ടാകുമെന്ന് നേരത്തെ റിപ്പോര്‍ട്ടുകളുണ്ടായിരുന്നു. ഇതേ കുറിച്ച് മമ്മൂട്ടിയോട് ഒരു അഭിമുഖത്തില്‍ ചോദിച്ചപ്പോള്‍ അദ്ദേഹം നല്‍കിയ മറുപടി ഏറെ രസകരമായിരുന്നു.

ബിലാലില്‍ ആരൊക്കെ ഉണ്ടാകുമെന്ന് ഇപ്പോള്‍ പറയാന്‍ പറ്റില്ല. അതിന്റെ ചര്‍ച്ചകളൊക്കെ നടക്കുകയാണ്. ബിലാലിനെ കുറിച്ചുള്ള കാര്യങ്ങള്‍ കൃത്യസമയത്ത് ആരാധകരെ അറിയിക്കുമെന്നും മമ്മൂട്ടി പറഞ്ഞു.