ആറാട്ട് ഒ.ടി.ടി. റിലീസിന് ! അധികം കാത്തിരിക്കേണ്ടി വരില്ല

മോഹന്‍ലാല്‍ ചിത്രം ആറാട്ട് ഒരു മാസത്തിനു ശേഷം ഒ.ടി.ടി. പ്ലാറ്റ്‌ഫോമിലും എത്തും. തിയറ്ററുകളില്‍ ചിത്രം ഇന്നലെയാണ് റിലീസ് ചെയ്തത്. തിയറ്ററുകളിലെത്തി ഒരു മാസം പിന്നിട്ട ശേഷം ഒ.ടി.ടി. പ്ലാറ്റ്ഫോമില്‍ റിലീസ് ചെയ്യാമെന്ന ധാരണയില്‍ ആറാട്ട് നിര്‍മാതാവ് ആമസോണ്‍ പ്രൈമുമായി കരാറില്‍ ഒപ്പിട്ടതായി വിവരമുണ്ട്.

ഇപ്പോള്‍ ലഭിക്കുന്ന വിവരമനുസരിച്ച് മാര്‍ച്ച് 25 നാണ് ചിത്രം ഒ.ടി.ടി. പ്ലാറ്റ്ഫോമില്‍ റിലീസ് ചെയ്യുക. ആറാട്ടിന്റെ ഒ.ടി.ടി. അവകാശം എത്ര കോടി രൂപയ്ക്കാണ് ആമസോണ്‍ പ്രൈം സ്വന്തമാക്കിയതെന്ന് പുറത്തുവിട്ടിട്ടില്ല.

ആറാട്ട് ലോകമെമ്പാടുമുള്ള തിയേറ്ററുകളില്‍ ഇന്നലെ മുതല്‍ പ്രദര്‍ശനം ആരംഭിച്ചു. 2700 സ്‌ക്രീനുകളിലാണ് പ്രദര്‍ശനം. ഉദയകൃഷ്ണയുടെ തിരക്കഥയില്‍ ബി.ഉണ്ണികൃഷ്ണനാണ് ചിത്രം സംവിധാനം ചെയ്തിരിക്കുന്നത്. പുലിമുരുകന് ശേഷം ഉദയകൃഷ്ണയും മോഹന്‍ലാലും ഒന്നിക്കുന്ന ചിത്രമെന്ന പ്രത്യേകതയും ആറാട്ടിനുണ്ട്.

നെയ്യാറ്റിന്‍കര ഗോപന്‍ എന്ന മാസ് കഥാപാത്രത്തെയാണ് മോഹന്‍ലാല്‍ ആറാട്ടില്‍ അവതരിപ്പിക്കുന്നത്. നെയ്യാറ്റിന്‍കര സ്വദേശിയായ ഗോപന്‍ ഒരു പ്രത്യേക ലക്ഷ്യത്തോടെ പാലക്കാട്ടെ ഒരു ഗ്രാമത്തില്‍ എത്തുന്നതും തുടര്‍ന്നുള്ള സംഭവങ്ങളുമാണ് ചിത്രത്തിന്റെ പ്ലോട്ട്. കോമഡിക്കൊപ്പം ആക്ഷനും പ്രാധാന്യമുള്ള ചിത്രമാണ് ആറാട്ട്.