ജീവിതത്തില്‍ ആരേയും ദ്രോഹിച്ചിട്ടില്ല; ചോദ്യം ചെയ്യലിനിടെ കൈ കൂപ്പി ദിലീപ്, നാടകീയ രംഗങ്ങള്‍

നടിയെ ആക്രമിച്ച കേസ് അന്വേഷിച്ച ഉദ്യോഗസ്ഥനെ വകവരുത്താന്‍ ഗൂഢാലോചന നടത്തിയെന്ന കേസില്‍ നടന്‍ ദിലീപിനെ 11 മണിക്കൂറോളം ചോദ്യം ചെയ്തു. ഇന്നത്തെ ചോദ്യം ചെയ്യല്‍ പൂര്‍ത്തിയായ ശേഷം ദിലീപ് വീട്ടിലേക്ക് മടങ്ങി. അടുത്ത ദിവസവും ചോദ്യം ചെയ്യല്‍ തുടരും.

ക്രൈം ബ്രാഞ്ച് ഓഫീസിലെ ചോദ്യം ചെയ്യലിനിടെ നാടകീയ രംഗങ്ങളാണ് അരങ്ങേറിയത്. പല ചോദ്യങ്ങള്‍ക്കും ദിലീപ് വൈകാരികമായാണ് പ്രതികരിച്ചത്. താന്‍ ജീവിതത്തില്‍ ഒരാളെ പോലും ദ്രോഹിച്ചിട്ടില്ലെന്ന് നടിയെ ആക്രമിച്ച കേസിലെ എട്ടാം പ്രതി കൂടിയായ ദിലീപ് പറഞ്ഞു.

കോടതിയില്‍ നടിയെ ആക്രമിക്കുന്ന ദൃശ്യങ്ങള്‍ കാണിച്ചപ്പോള്‍ അത് കാണേണ്ടെന്നാണ് പറഞ്ഞത്. കാരണം നടിയെ ആ അവസ്ഥയില്‍ കാണാനുള്ള മനസ്സ് ഇല്ലാത്തത് കൊണ്ടായിരുന്നു അതെന്നും ദിലീപ് ഇന്നത്തെ ചോദ്യം ചെയ്യലില്‍ അന്വേഷണ ഉദ്യോഗസ്ഥരോട് പറഞ്ഞു. നടി ആക്രമിക്കപ്പെട്ട കേസിലെ അന്വേഷണ ഉദ്യോഗസ്ഥനെ കൊല്ലാന്‍ ഗുഢാലോചന നടന്നുവെന്ന ആരോപണം തെറ്റാണെന്നും ദിലീപ് പറഞ്ഞു.

അതേസമയം, ചോദ്യം ചെയ്യലില്‍ ദിലീപ് നല്‍കിയ മൊഴികളില്‍ നിറയെ പൊരുത്തക്കേടുകളുണ്ടെന്ന് ക്രൈംബ്രാഞ്ച് വൃത്തങ്ങള്‍ അറിയിച്ചു. തെളിവുകളുള്ള കാര്യങ്ങളില്‍ പോലും നിഷേധാത്മക മറുപടിയാണ് ദിലീപ് നല്‍കുന്നത്. അന്വേഷണം വഴിതിരിച്ചുവിടാന്‍ ദിലീപ് ബോധപൂര്‍വ്വം ശ്രമിക്കുന്നുണ്ടെന്ന് അന്വേഷണസംഘം ആരോപിച്ചു.