മലയാളികൾ എഴുതി, നായികയും മലയാളി തന്നെ; ധനുഷ് ചിത്രം ഒ ടി ടി റിലീസിന്

മലയാളികളായ സുഹാസും ഷറഫുവും ചേർന്നെഴുതിയ ധനുഷ് ചിത്രം ഒ ടി ടി റിലീസിന് തയ്യാറെടുക്കുന്നു. ‘മാരൻ’ എന്ന് പേരിട്ടിരിക്കുന്ന സിനിമയിൽ മലയാളിയായ മാളവിക മോഹനനാണ് നായിക. കാർത്തിക് നരേൻ സംവിധാനം ചെയ്യുന്ന സിനിമ ഒരു ആക്ഷൻ ത്രില്ലറാണ്.

ഡിസ്‌നി ഹോട്ട് സ്റ്റാറിലാണ് മാരൻ പ്രദർശനത്തിനെത്തുക. ഇൻവെസ്റ്റിഗേറ്റീവ് ജേർണലിസ്റ്റുകളായാണ് ധനുഷും മാളവികയും ഈ സിനിമയിൽ അഭിനയിച്ചിരിക്കുന്നത് എന്നാണ് റിപ്പോർട്ടുകൾ.

സമുദ്രക്കനിയും ഈ സിനിമയിൽ ഒരു സുപ്രധാന കഥാപാത്രത്തെ അവതരിപ്പിക്കുന്നു. വിവേകാനന്ദ് സന്തോഷം ക്യാമറ ചലിപ്പിക്കുന്ന മാരന്റെ സംഗീതം ജി വി പ്രകാശ് കുമാറാണ്.

സത്യജ്യോതി ഫിലിംസാണ് മാരൻ നിർമ്മിച്ചിരിക്കുന്നത്.

ജഗമേ തന്തിരം, അത് രംഗി രേ എന്നീ സിനിമകൾക്ക് ശേഷം ഒ ടി ടിയിൽ റിലീസ് ചെയ്യുന്ന ധനുഷ് ചിത്രമാണ് മാരൻ. സുഹാസും ഷറഫുവും എഴുതിയ ‘വരത്തൻ’ മലയാളത്തിൽ വലിയ ഹിറ്റായ സിനിമയായിരുന്നു.