Exclusive: അജഗജാന്തരത്തിന്റെ കഥ ആദ്യം പറഞ്ഞത് ലിജോ ജോസ് പെല്ലിശ്ശേരിയോട്; ഒഴിവാക്കാന്‍ കാരണം ഇത്

ക്രിസ്മസ് റിലീസുകളില്‍ ഏറ്റവും പ്രതീക്ഷയോടെ പ്രേക്ഷകര്‍ കാത്തിരിക്കുന്ന സിനിമയാണ് അജഗജാന്തരം. ആന്റണി പെപ്പെ, അര്‍ജുന്‍ അശോകന്‍ എന്നിവര്‍ ശ്രദ്ധേയമായ വേഷങ്ങള്‍ അവതരിപ്പിക്കുന്ന സിനിമ സംവിധാനം ചെയ്തിരിക്കുന്നത് ടിനു പാപ്പച്ചനാണ്. വിനീത് വിശ്വം, കിച്ചു ടെല്ലസ് എന്നിവര്‍ ചേര്‍ന്നാണ് സിനിമയുടെ തിരക്കഥ ഒരുക്കിയിരിക്കുന്നത്. വലിയൊരു ഇടവേളയ്ക്ക് ശേഷം മലയാളത്തില്‍ ആനയും പൂരവും പ്രമേയമായി വരുന്ന ചിത്രമാണ് അജഗജാന്തരം. സിനിമയുടെ ട്രെയ്‌ലര്‍ ഇതിനോടകം ഏറെ ശ്രദ്ധിക്കപ്പെട്ടിട്ടുണ്ട്.

അജഗജാന്തരത്തിന്റെ കഥയുമായി ആദ്യം പോയത് പ്രശസ്ത സംവിധായകന്‍ ലിജോ ജോസ് പെല്ലിശ്ശേരിയുടെ അടുത്തേക്കാണെന്ന് തിരക്കഥാകൃത്തുക്കളില്‍ ഒരാളായ കിച്ചു ടെല്ലസ് പറയുന്നു. തിരക്കഥ ഇഷ്ടപ്പെട്ടിട്ടും ലിജോ ജോസ് പെല്ലിശ്ശേരി ഈ സിനിമ ചെയ്യുന്നില്ലെന്ന് തീരുമാനിക്കാനുള്ള കാരണവും കിച്ചു ടെല്ലസ് വെളിപ്പെടുത്തി.

ടിനു പാപ്പച്ചനിലേക്ക് എത്തിയത് ലിജോ ജോസ് പെല്ലിശ്ശേരി വഴിയാണെന്നും കിച്ചു വെളിപ്പെടുത്തി. ‘ലിജോ ജോസ് പെല്ലിശ്ശേരിയുടെ അടുത്താണ് ആദ്യം കഥ പറഞ്ഞത്. അങ്കമാലി ഡയറീസില്‍ പോര്‍ക്കിന്റെ പിന്നാലെ പോയി, ജെല്ലിക്കെട്ടില്‍ പോത്തിന്റേയും. അതുകൊണ്ട് വീണ്ടും ഒരു മൃഗവുമായി ബന്ധപ്പെട്ട സിനിമ ചെയ്യാന്‍ ഇപ്പോള്‍ നോക്കുന്നില്ലെന്ന് അദ്ദേഹം പറഞ്ഞു. ടിനു പാപ്പച്ചന്‍ സംവിധാനം ചെയ്യുമെന്ന് പറഞ്ഞതും ലിജോ ജോസ് പെല്ലിശ്ശേരി തന്നെയാണ്,’ കിച്ചു ടെല്ലസ് പറഞ്ഞു.