Gossips
ഭ്രമയുഗത്തിന്റെ ക്ലൈമാക്‌സ് ഞെട്ടിക്കുമോ? പുതിയ അപ്‌ഡേറ്റ് ഇതാണ്
മമ്മൂട്ടിയെ നായകനാക്കി രാഹുല്‍ സദാശിവന്‍ സംവിധാനം ചെയ്ത ‘ഭ്രമയുഗം’ ഫെബ്രുവരി 15 ന് തിയറ്ററുകളിലെത്തുകയാണ്. വര്‍ഷങ്ങള്‍ക്കു ശേഷമാണ് ഒരു മലയാള സിനിമ പൂര്‍ണമായി ബ്ലാക്ക് ആന്‍ഡ് വൈറ്റില്‍ എത്തുന്നത്. ചിത്രത്തെ കുറിച്ചുള്ള നിര്‍ണായക റിപ്പോര്‍ട്ടുകള്‍ നേരത്തെ പുറത്തുവന്നിരുന്നു. മലയാളത്തില്‍ സമീപകാലത്ത് കണ്ട ഏറ്റവും ആശ്ചര്യപ്പെടുത്തുന്ന ക്ലൈമാക്സായിരിക്കും ഭ്രമയുഗത്തിലേതെന്ന് സെന്‍സറിങ്ങിനു ശേഷം ഫിലിം ട്രാക്കര്‍ റിപ്പോര്‍ട്ട് ചെയ്യുന്നു. ഒരേസമയം പ്രേക്ഷകരെ ഭയപ്പെടുത്തുകയും ആശ്ചര്യപ്പെടുത്തുകയും ചെയ്യാന്‍ ഭ്രമയുഗം ക്ലൈമാക്സിനു സാധിക്കുമെന്നാണ് റിപ്പോര്‍ട്ട്.
രണ്ട് മണിക്കൂറും 20 മിനിറ്റുമാണ് ഭ്രമയുഗത്തിന്റെ ദൈര്‍ഘ്യം. കുഞ്ചമന്‍ പോറ്റി എന്ന കഥാപാത്രത്തെയാണ് മമ്മൂട്ടി ചിത്രത്തില്‍ അവതരിപ്പിക്കുന്നത്. സിനിമയെ കുറിച്ചും മമ്മൂട്ടിയുടെ കഥാപാത്രത്തെ കുറിച്ചുമുള്ള കൂടുതല്‍ വിവരങ്ങള്‍ ഇപ്പോള്‍ പുറത്തുവന്നിരിക്കുകയാണ്.
തന്ത്രവും മായയും ദൈനംദിന ജീവിതത്തിന്റെ ഭാഗമായിരുന്ന പ്രാചീന കേരളത്തിലാണ് കഥ നടക്കുന്നത്. പാണ സമുദായത്തില്‍ നിന്നുള്ള തേവന്‍ എന്ന നാടോടി പാട്ടുകാരന്‍ ദുരൂഹത നിറഞ്ഞ ഒരു മനയ്ക്കലേക്ക് അവിചാരിതമായി എത്തിപ്പെടുന്നു. അടിമ വില്‍പ്പന നടക്കുന്ന ഒരു ചന്തയില്‍ നിന്ന് രക്ഷപ്പെടുന്നതിനിടെയാണ് തേവന്‍ ഈ മനയ്ക്കലില്‍ എത്തുന്നത്. കുഞ്ചമന്‍ പോറ്റിയെന്ന മമ്മൂട്ടി കഥാപാത്രമാണ് ഈ മനയുടെ ഉടമ. അര്‍ജുന്‍ അശോകന്‍ ആണ് തേവന്‍ എന്ന കഥാപാത്രത്തെ അവതരിപ്പിക്കുന്നത്. ചിത്രത്തില്‍ 50 മിനിറ്റ് ദൈര്‍ഘ്യം മാത്രമാണ് മമ്മൂട്ടി കഥാപാത്രത്തിനുള്ളത്.
