Gossips
അച്ഛനും മകനും നേർക്കുനേർ എത്തുന്ന ചിത്രങ്ങൾ നാളെ തിയേറ്ററുകളിൽ
മലയാള സിനിമയുടെ മെഗാസ്റ്റാർ മമ്മൂട്ടിയും മകൻ ദുൽഖർ സൽമാനും അഭിനയിക്കുന്ന രണ്ട് വ്യത്യസ്ത ചിത്രങ്ങൾ നാളെ (നവംബർ 20) ലോകമെമ്പാടുമുള്ള തിയേറ്ററുകളിൽ ഒരേദിവസം പ്രദർശനത്തിനെത്തുന്നു. അച്ഛനും മകനും ബോക്സ് ഓഫീസിൽ നേർക്കുനേർ എത്തുന്ന അപൂർവ്വ നിമിഷത്തിനാണ് നാളെ സിനിമാലോകം സാക്ഷ്യം വഹിക്കുന്നത്.
മമ്മൂട്ടിയും തമിഴ് താരം ധനുഷും പ്രധാന വേഷങ്ങളിലെത്തുന്ന തമിഴ് ആക്ഷൻ ഡ്രാമ ‘ഓം: ചാപ്റ്റർ വൺ , ദുൽഖർ സൽമാൻ നായകനാകുന്ന പാൻ ഇന്ത്യൻ ചിത്രം ‘ആകാശംലോ ഒക താര’ എന്നിവയാണ് നാളെ റിലീസ് ചെയ്യുന്നത്.
റിലീസിന് മുന്നോടിയായി രണ്ട് സിനിമകൾക്കും വിജയാശംസകൾ നേർന്നുകൊണ്ട് മമ്മൂട്ടിയും ദുൽഖറും ഒരുമിച്ച് പ്രത്യക്ഷപ്പെടുന്ന പ്രമോഷണൽ വീഡിയോ സമൂഹമാധ്യമങ്ങളിൽ തരംഗമായിക്കഴിഞ്ഞു. “എന്നും അൻപോടെ ഇരിക്കാം, രണ്ട് സിനിമകളും തിയേറ്ററുകളിൽ പോയി കണ്ട് ആസ്വദിക്കൂ” എന്ന അടിക്കുറിപ്പോടെ മമ്മൂട്ടിയുടെ പേഴ്സണൽ മേക്കപ്പ്മാനായ എസ്. ജോർജ്ജ് പങ്കുവെച്ച ഈ വീഡിയോ ആരാധകർ ഏറ്റെടുത്തിട്ടുണ്ട്.
രണ്ട് സിനിമകളും തികച്ചും വ്യത്യസ്തമായ ജോണറുകളിലുള്ളതാണെന്നും പ്രേക്ഷകർ രണ്ട് ചിത്രങ്ങളെയും ഇരുകൈയും നീട്ടി സ്വീകരിക്കണമെന്നും ദുൽഖർ സൽമാൻ അഭ്യർത്ഥിച്ചു.
