Gossips
കളങ്കാവലി’ന് ശേഷം ജിതിൻ കെ. ജോസ്; ജയസൂര്യയുടെ ‘മായൻ: ചാപ്റ്റർ 1’ ടീസർ ഉടൻ
ജയസൂര്യ പൊലീസ് ഉദ്യോഗസ്ഥനായി എത്തുന്ന ‘മായൻ: ചാപ്റ്റർ 1’ എന്ന ചിത്രത്തിന്റെ ടീസർ ഉടൻ പുറത്തിറങ്ങും. ഇക്കാര്യം അറിയിച്ച് നിർമാണക്കമ്പനിയായ മാജിക് മൂൺ പ്രൊഡക്ഷൻസ് പുതിയ പോസ്റ്റർ പുറത്തുവിട്ടു. “നിഗൂഢത ആഴത്തിലാകുന്നു” എന്ന കുറിപ്പോടെയാണ് പോസ്റ്റർ പങ്കുവെച്ചത്.
പൊട്ടിയ കണ്ണാടിയുടെ പശ്ചാത്തലത്തിൽ പൊലീസ് യൂണിഫോമിൽ നിൽക്കുന്ന കഥാപാത്രമാണ് പോസ്റ്ററിൽ. യൂണിഫോമിലെ നെയിം ബോർഡിൽ ‘ജെസൺ വർഗീസ്, സബ് ഇൻസ്പെക്ടർ ഓഫ് പോലീസ്’ എന്ന് കാണാം. “ബിയോണ്ട് ദ ഷാഡോസ്” എന്നാണ് ചിത്രത്തിന്റെ ടാഗ്‌ലൈൻ.
2025ൽ മമ്മൂട്ടിയെ നായകനാക്കി ‘കളങ്കാവൽ’ സംവിധാനം ചെയ്ത ജിതിൻ കെ. ജോസിന്റെ രണ്ടാമത്തെ ചിത്രമാണിത്. ‘കളങ്കാവൽ’ കഴിഞ്ഞ വർഷത്തെ ഏറ്റവും കൂടുതൽ കളക്ഷൻ നേടിയ മലയാള ചിത്രങ്ങളിലൊന്നായിരുന്നു.നന്മയും തിന്മയും തമ്മിലുള്ള പോരാട്ടമാണ് ചിത്രത്തിന്റെ പ്രമേയമെന്നാണ് ഇതിൽ നിന്നുള്ള സൂചന.
രാജീവ് ഗോവിന്ദനാണ് നിർമാതാവ്. റാഫിയും ജിതിൻ കെ. ജോസും ചേർന്ന് തിരക്കഥ എഴുതി. ‘കളങ്കാവലി’ന്റെ ഛായാഗ്രാഹകൻ ഫൈസൽ അലി, എഡിറ്റർ പ്രവീൺ പ്രഭാകർ, സംഗീതസംവിധായകൻ മുജീബ് മജീദ് എന്നിവർ ഈ ചിത്രത്തിലും ഒപ്പമുണ്ട്. പിസി സ്റ്റണ്ട്സാണ് സംഘട്ടനം ഒരുക്കുന്നത്. ചിത്രം ഡിസംബർ 3ന് റിലീസ് ചെയ്യുമെന്നാണ് റിപ്പോർട്ടുകൾ.
