latest news
നടിമാരുടെ ചിത്രങ്ങള്‍ മോശം കോണില്‍നിന്ന് പകര്‍ത്തരുത്; സല്‍മാന്‍ഖാന്‍
നടിമാരുടേതുള്‍പ്പെടെ താരങ്ങളുടെ ചിത്രങ്ങള്‍ അനുചിതമായ കോണുകളില്‍ നിന്ന് പകര്‍ത്തുന്ന പാപ്പരാസി രീതിക്കെതിരെ വീണ്ടും തുറന്നടിച്ച് ബോളിവുഡ് താരം സല്‍മാന്‍ ഖാന്‍. താരങ്ങളുടെ സ്വകാര്യതയെയും അന്തസ്സിനെയും ബാധിക്കുന്ന ഇത്തരം ചിത്രീകരണരീതികള്‍ അവസാനിപ്പിക്കണമെന്ന നിലപാടാണ് മുംബൈയില്‍ വ്യാഴാഴ്ച നടന്ന ഐഐഎഫ്എ (IIFA) പുരസ്‌കാര പ്രഖ്യാപന വാര്‍ത്താസമ്മേളനത്തിലും താരം ആവര്‍ത്തിച്ചത്. കഴിഞ്ഞ ദിവസം നടന്‍ ടൈഗര്‍ ഷ്രോഫിന് നേരെയുണ്ടായ വെടിവയ്പ്പിനെ തുടര്‍ന്ന് സുരക്ഷ ശക്തമാക്കിയ ശേഷമുള്ള സല്‍മാന്റെ ആദ്യ പൊതുപരിപാടി കൂടിയായിരുന്നു ഇത്.
റെഡ് കാര്‍പ്പറ്റില്‍ പാപ്പരാസികള്‍ ചിത്രങ്ങള്‍ പകര്‍ത്തുന്നതിനിടെയാണ് സല്‍മാന്‍ തന്റെ നിലപാട് ഓര്‍മിപ്പിച്ചത്. ”പിന്നില്‍നിന്നുള്ള ചിത്രങ്ങള്‍ എടുക്കരുതെന്ന കാര്യം ഓര്‍മിക്കണം. ഇത്രയെങ്കിലും ബഹുമാനം എല്ലാവര്‍ക്കും നല്‍കാമല്ലോ” എന്നായിരുന്നു താരത്തിന്റെ വാക്കുകള്‍. നടിമാരെ മോശം കോണുകളില്‍നിന്ന് ചിത്രീകരിക്കുന്ന രീതിക്കെതിരെ നേരത്തെയും സല്‍മാന്‍ പരസ്യമായി രംഗത്തെത്തിയിരുന്നു. ‘ബിഗ് ബോസ് 20’യുടെ ഒരു എപ്പിസോഡിലായിരുന്നു ഇതിനെതിരെ താരം ആദ്യം ശക്തമായി പ്രതികരിച്ചത്.
കഴിഞ്ഞയാഴ്ച ജിയോഹോട്ട്സ്റ്റാറില്‍ സംപ്രേഷണം ചെയ്ത ‘കോഫി വിത്ത് കരണ്‍ 9’ന്റെ ആദ്യ എപ്പിസോഡിലും സല്‍മാന്‍ വിഷയം ഉന്നയിച്ചിരുന്നു. പിആര്‍ സംവിധാനങ്ങള്‍ വ്യാപകമായതോടെ താരങ്ങളുടെ വരവും പോക്കും ചിത്രീകരിക്കാന്‍ പണം നല്‍കുന്ന പ്രവണതയുണ്ടായെന്നും, അത്തരം ചിത്രങ്ങള്‍ വേണ്ടെന്ന് ആഗ്രഹിക്കുന്നവര്‍ക്കു വേണ്ടിയാണ് താന്‍ സംസാരിക്കുന്നതെന്നും താരം പറഞ്ഞു. ഫോണ്‍ ക്യാമറ വന്നതോടെ ജീവിതം തന്നെ ബുദ്ധിമുട്ടിലായെന്നും ‘ഗെസ് ഹൂ’ എന്ന രീതിയിലുള്ള ചിത്രങ്ങള്‍ തന്നെ അസ്വസ്ഥനാക്കാറുണ്ടെന്നും സല്‍മാന്‍ കൂട്ടിച്ചേര്‍ത്തു.
