Uncategorized
‘പ്രേമലു’ കൂട്ടുകെട്ട് വീണ്ടുമൊന്നിക്കുന്നു; മമിത ബൈജുവും സംഗീത് പ്രതാപും ഒന്നിക്കുന്ന ‘ഹലോ ഡിയർ’ റിലീസ് തീയതി പ്രഖ്യാപിച്ചു!
ബ്ലോക്ക്ബസ്റ്റർ ചിത്രമായ ‘പ്രേമലു’വിലൂടെ പ്രേക്ഷകരുടെ പ്രിയപ്പെട്ടവരായി മാറിയ മമിത ബൈജുവും സംഗീത് പ്രതാപും വീണ്ടും ഒന്നിക്കുന്ന പുതിയ ചിത്രമായ ‘ഹലോ ഡിയർ’ എന്ന സിനിമയുടെ പുതിയ അപ്ഡേറ്റ് പുറത്തുവന്നു. ചിത്രത്തിന്റെ ആകർഷകമായ പുതിയ പോസ്റ്ററിനൊപ്പം റിലീസ് തീയതിയാണ് അണിയറപ്രവർത്തകർ ഇപ്പോൾ ഔദ്യോഗികമായി പ്രഖ്യാപിച്ചിരിക്കുന്നത്. ചിത്രം 2027 ജനുവരി 29-ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യുമെന്നാണ് സോഷ്യൽ മീഡിയയിലൂടെ അണിയറപ്രവർത്തകർ അറിയിച്ചിരിക്കുന്നത്.
‘തണ്ണീർമത്തൻ ദിനങ്ങൾ’ എന്ന സിനിമയുടെ സഹരചയിതാവും അഭിനേതാവുമായ ഡിനോയ് പൗലോസ് ആദ്യമായി സംവിധാനം ചെയ്യുന്ന ചിത്രമാണിത്. യുവതലമുറയുടെ പ്രണയവും നഗരജീവിത പശ്ചാത്തലവും ഹാസ്യത്തിന് പ്രാധാന്യം നൽകി പറയുന്ന ഒരു ഫുൾ ലെങ്ത് റൊമാന്റിക് കോമഡി എന്റർടൈനറായാണ് ചിത്രം ഒരുങ്ങുന്നത്. ‘എ ഹലോ ഈസ് ജസ്റ്റ് ദി ബിഗിനിങ്’ എന്ന ക്യാപ്ഷനോടെ എത്തുന്ന ചിത്രം ഏറെ പ്രതീക്ഷയോടെയാണ് സിനിമാ പ്രേമികൾ കാത്തിരിക്കുന്നത്.
ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാൻ നിർമ്മിക്കുന്ന ഈ ചിത്രത്തിന് വേണ്ടി പ്രശസ്ത സംഗീതജ്ഞൻ ഗോവിന്ദ് വസന്തയാണ് സംഗീത സംവിധാനം നിർവ്വഹിക്കുന്നത്. അഖിൽ ജോർജ് ഛായാഗ്രഹണവും ചാമൻ ചാക്കോ എഡിറ്റിംഗും നിർവ്വഹിക്കുന്ന ചിത്രത്തിന്റെ പുറത്തുവന്ന പോസ്റ്റർ സോഷ്യൽ മീഡിയയിൽ ഇതിനോടകം തന്നെ വലിയ ശ്രദ്ധ നേടിക്കഴിഞ്ഞു.
