താരനിരയുണ്ടായിട്ടും കാണികളില്ല; ‘ദായ്‌റ’ പ്രതിസന്ധിയിൽ

കരീന കപൂറും പൃഥ്വിരാജ് സുകുമാരനും ഒരുമിച്ചെത്തിയ ‘ദായ്‌റ’ ബോക്സ് ഓഫീസിൽ കടുത്ത വെല്ലുവിളി നേരിടുകയാണ്. സെപ്റ്റംബർ 18ന് റിലീസ് ചെയ്ത ചിത്രം, നാല് ദിവസം പിന്നിട്ടിട്ടും 5 കോടി രൂപ പോലും നേടാനായില്ല .

ആദ്യ ദിനം വെറും ഒരു കോടി രൂപയാണ് ചിത്രം നേടിയത്. ശനിയാഴ്ചയും ഞായറാഴ്ചയും ചെറിയ വളർച്ച കാണിച്ചെങ്കിലും, തിങ്കളാഴ്ചയായപ്പോഴേക്കും കളക്ഷൻ കുത്തനെ ഇടിഞ്ഞു. തിങ്കളാഴ്ച കേവലം 40 ലക്ഷത്തോളം രൂപ മാത്രമാണ് ചിത്രത്തിന് ലഭിച്ചത്. നാല് ദിവസത്തെ ആകെ കളക്ഷൻ ഏകദേശം 4.5 കോടി രൂപയിൽ ഒതുങ്ങി.

ഏകദേശം 55 കോടി രൂപ മുതൽമുടക്കിൽ ഒരുക്കിയ ചിത്രത്തിന്റെ ഈ പ്രകടനം, നിർമാതാക്കൾക്ക് വലിയ തിരിച്ചടിയായി മാറുകയാണ്.

മേഘ്‌ന ഗുൽസാർ സംവിധാനം ചെയ്ത ചിത്രത്തിന് നിരൂപകരിൽ നിന്ന് മോശമല്ലാത്ത പ്രതികരണമാണ് ലഭിച്ചത്.

നല്ല അഭിപ്രായങ്ങൾ ലഭിച്ചിട്ടും കാണികളെ തിയേറ്ററിലേക്ക് ആകർഷിക്കാൻ ചിത്രത്തിന് കഴിയാത്തത്, ഗൗരവമേറിയ പ്രമേയങ്ങളുള്ള ചിത്രങ്ങൾ ഇന്ന് നേരിടുന്ന വിപണന വെല്ലുവിളികളെയാണ് ചൂണ്ടിക്കാട്ടുന്നത്. പ്രമോഷനുകൾ വേണ്ടത്ര ഫലം കണ്ടില്ല എന്ന വിലയിരുത്തലും ഉയരുന്നുണ്ട്.