ആദ്യ സിനിമയും ഐശ്വര്യയുമായുള്ള പ്രണയവും; അഭിഷേക് ബച്ചന്‍ മനസ് തുറക്കുന്നു

2014ല്‍ പ്രോ കബഡി ലീഗിന്റെ ആദ്യ സീസണിന് മുന്നോടിയായി ജയ്പൂര്‍ ടീമിനെ സ്വന്തമാക്കിയാണ് അഭിഷേക് ബച്ചന്‍ സംരംഭകന്റെ റോളിലേക്ക് ചുവടുവച്ചത്. ‘ജയ്പൂര്‍ പിങ്ക് പാന്തേഴ്‌സ്’ എന്ന് പേരിട്ട ടീമിന്റെ തുടക്കം തന്നെ ഗംഭീരമായിരുന്നു. ലീഗിന്റെ ആദ്യ സീസണിലും ഒമ്പതാം സീസണിലും ടീം കിരീടം നേടി.

എന്നാല്‍ ഒട്ടേറെ നഗരങ്ങളില്‍ നിന്ന് ജയ്പൂരിനെ തന്നെ ടീമിനായി തിരഞ്ഞെടുക്കാന്‍ അഭിഷേകിനെ പ്രേരിപ്പിച്ചതെന്താണ്? ‘ഫ്യൂച്ചര്‍ അണ്‍പ്ലഗ്ഡ്’ പോഡ്കാസ്റ്റില്‍ സംസാരിക്കവെയാണ് താരത്തിന്റെ മറുപടി.

”എന്റെ ആദ്യ സിനിമയുടെ ഒരു ഭാഗം ചിത്രീകരിച്ചത് ജയ്പൂരിലാണ്. പുതിയതായി എന്തെങ്കിലും തുടങ്ങാന്‍ അത് ശുഭകരമായ സ്ഥലമാണെന്ന് തോന്നി,” അഭിഷേക് പറഞ്ഞു.

ജെ.പി. ദത്ത സംവിധാനം ചെയ്ത 2000ലെ ‘റെഫ്യൂജി’യിലൂടെയാണ് അഭിഷേക് ബോളിവുഡില്‍ അരങ്ങേറ്റം കുറിച്ചത്. പ്രധാനമായും ഗുജറാത്തിലെ കച്ചിലാണ് ചിത്രം ചിത്രീകരിച്ചത്. എന്നാല്‍ ജയ്പൂരിലും മുംബൈയിലെ സ്റ്റുഡിയോയിലുമായി ചിത്രത്തിന്റെ ചില പ്രധാന ഭാഗങ്ങള്‍ ചിത്രീകരിച്ചിരുന്നു.

ജയ്പൂരിന് മറ്റൊരു വൈകാരിക ബന്ധം കൂടിയുണ്ടെന്നും അഭിഷേക് പറഞ്ഞു. ”ഐശ്വര്യയും ഞാനും ഡേറ്റിങ് ആരംഭിച്ച നഗരവും ഇതാണ്. അതിനൊരു വൈകാരികമായ ഭാഗമുണ്ട്,” താരം പറഞ്ഞു.

2006ല്‍ പുറത്തിറങ്ങിയ ജെ.പി. ദത്തയുടെ ‘ഉമ്രാവോ ജാന്‍’ എന്ന ചിത്രത്തില്‍ ഒരുമിച്ച് അഭിനയിക്കുന്നതിനിടെയാണ് അഭിഷേകും ഐശ്വര്യ റായിയും പ്രണയത്തിലായത്. ചിത്രത്തിന്റെ ചില ഭാഗങ്ങളും ജയ്പൂരില്‍ ചിത്രീകരിച്ചിരുന്നു.

ടീമിനായി ജയ്പൂര്‍ തിരഞ്ഞെടുക്കുക മാത്രമല്ല, പേരിടുന്നതിലും കുടുംബത്തിന് പ്രത്യേക സ്ഥാനമാണ് അഭിഷേക് നല്‍കിയത്. ജയ്പൂര്‍ ‘പിങ്ക് സിറ്റി’ എന്നറിയപ്പെടുന്നതുകൊണ്ടുമാത്രമല്ല ടീമിന്റെ പേരില്‍ ‘പിങ്ക്’ വന്നതെന്നും ആ സമയത്ത് മകള്‍ ആരാധ്യയുടെ പ്രിയപ്പെട്ട നിറമായിരുന്നതുകൊണ്ടാണെന്നും അഭിഷേക് വെളിപ്പെടുത്തി.

‘പിങ്ക് പാന്തര്‍’ എന്ന പേരിനും കുടുംബവുമായി പ്രത്യേക ബന്ധമുണ്ടെന്ന് താരം പറഞ്ഞു. 2009ല്‍ പുറത്തിറങ്ങിയ ഹോളിവുഡ് ചിത്രം ‘ദി പിങ്ക് പാന്തര്‍ 2’ല്‍ ഐശ്വര്യ സോണിയ എന്ന പ്രധാന എതിരാളി കഥാപാത്രത്തെ അവതരിപ്പിച്ചിരുന്നു.

”ഞങ്ങളുടെ പിങ്ക് പാന്തറിന് നീല-പച്ച കണ്ണുകളാണ്. അത് എന്റെ ഭാര്യയുടെ കണ്ണുകളുടെ നിറം തന്നെയാണ്. അതുകൊണ്ട് ജയ്പൂര്‍ പിങ്ക് പാന്തേഴ്‌സുമായി ബന്ധപ്പെട്ട എല്ലാത്തിനും വ്യക്തിപരമായൊരു ബന്ധമുണ്ട്,” അഭിഷേക് പറഞ്ഞു.

അഭിഷേകും ഐശ്വര്യയും ആദ്യമായി ഒരുമിച്ച് അഭിനയിച്ചത് രാജ് കന്‍വര്‍ സംവിധാനം ചെയ്ത 2000ലെ ‘ധായ് അക്ഷര്‍ പ്രേം കേ’യിലാണ്. പിന്നീട് 2003ല്‍ ‘കുച്ച് നാ കഹോ’യിലും ഇരുവരും ഒന്നിച്ചു.

2005ലെ ‘ബണ്ടി ഔര്‍ ബബ്ലി’യിലെ ‘കജ്രാ രേ’ എന്ന ഗാനരംഗത്തിലൂടെ ഇരുവരും വീണ്ടും ശ്രദ്ധ നേടി. അഭിഷേകിനൊപ്പം പിതാവ് അമിതാഭ് ബച്ചനും ആ ഗാനരംഗത്ത് ഉണ്ടായിരുന്നു.

‘ഉമ്രാവോ ജാന്‍’ന് ശേഷം 2006ല്‍ സഞ്ജയ് ഗാധ്വിയുടെ ‘ധൂം 2’യിലും ഇരുവരും ഒന്നിച്ചു. തുടര്‍ന്ന് മണിരത്‌നത്തിന്റെ 2007ലെ ‘ഗുരു’വില്‍ അഭിനയിച്ചു. ചിത്രത്തിന്റെ റിലീസിന് മുന്നോടിയായി ഇരുവരുടെയും വിവാഹനിശ്ചയവും പ്രഖ്യാപിച്ചു. അതേ വര്‍ഷം ഇരുവരും വിവാഹിതരായി.

വിവാഹശേഷം രാം ഗോപാല്‍ വര്‍മ്മ സംവിധാനം ചെയ്ത 2008ലെ ‘സര്‍ക്കാര്‍ രാജ്’ എന്ന ചിത്രത്തിലും അഭിഷേകും ഐശ്വര്യയും ഒരുമിച്ച് അഭിനയിച്ചു.